“Reformë tarifore për energjinë” – ERE miraton objektivat strategjikë për 2-vjeçarin: Në fokus, mbrojtja e konsumatorit
Mbrojtja e konsumatorit do të jetë objektivi strategjik kryesor i Entit Rregullator të Energjisë përgjatë periudhës 2021-2023. Ky dikaster ka miratuar dokumentin për 2-vjeçarin , si një detyrim që rrjedh nga legjislacionin në fuqi, teksa parashikon një sërë masash në drejtim të ndërgjergjësimit të konsumatorit për t’u bërë klient i aftë në vlerësimin e ofertave dhe kuptimin e drejtë të mekanizmave të tregut të energjisë e deri në mundësinë për të marrë pjesë në mënyrë aktive në shërbimet e lidhura me furnizimin, siç është rasti i vetëprodhuesve që prodhojnë dhe konsumojnë vetë energji.
Sipas ERE-s, strategjia ka në fokus të saj, vendosjen e rregullave që e bëjnë më të lehtë për konsumatorin që të prodhojë dhe të shesë energji si vetëprodhues, të garantojë transparencë për të drejtat e konsumatorit dhe mundësi më të mira zgjedhjeje sa i përket shërbimit dhe çmimeve. Ndërkohë që, sa i përket zhvillimit të tregjeve të integruar të Energjisë Elektrike dhe Gazit Natyror, në prioritetet e ERE-s, përfshihet edhe zhvillimi i një reforme tarifore nisur nga riorganizimi i tregut, për qëllim të së cilës parashikohet, analiza e problematikave të konstatuara pas miratimit të metodologjive dhe adresimi i zgjidhjeve përmes praktikave më të mira.
Gjithashtu, parashikohet realizimi i një studimi në mënyrë që të vlerësohen mundësitë që çojnë në uljen e kostove për konsumatorët dhe mbështesin tranzicionin drejt liberalizimit të plotë etj. Lidhur me realizimin e tregut të përbashkët Shqipëri–Kosovë, ERE angazhohet të luajë një rol të rëndësishëm, duke aprovuar bashkëpunimin dhe marrëveshjet operacionale të propozuara nga Operatori i Sistemit të Transmetimit dhe Bursa e energjisë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.