Reformimi i shëndetësisë – Manastirliu: Administrata do të jetë më eficiente
Reforma në administratën publike po vijon me ristrukturimin e institucioneve në të gjitha nivelet. Në Ministrinë e Shëndetësisë dhe Mbrojtjes Sociale u diskutua me institucionet e varësisë për thellimin e procesit të ristrukturimit. Ministrja Ogerta Manastriliu gjatë fjalës së saj u ndal tek orientimi i strukturës së re drejt plotësimit të nevojave të qytetarëve në kohë dhe me cilësi.
“Qytetarët kërkojnë shërbim shëndetësor dhe social të sigurtë, cilësor, në kohë dhe pranë vendbanimit. Ndaj, me vëmendjen e veçantë të Kryeministrit, Qeveria shqiptare ka nisur tashmë reformën në administratën publike me synim ndërtimin e një administrate që bën gjënë e duhur dhe që është e fokusuar te shërbimet për qytetarët; një administratë që garanton qëndrueshmëri të rezultateve dhe mbi të gjitha operon me të njëjtin standard”, tha Manastirliu.
Zv/Kryeministrja Mesi theksoi nevojën për ndryshime në strukturën e institucioneve për shkak të problematikave të shfaqura ndër vite për mënyrën e organizimit funksional dhe strukturor.
“Për ne si Qeveri është me rëndësi orientimi nga qytetari sepse ata kanë pritshmëri të larta nga institucionet qeverisëse të vendit. Ndaj i gjithë procesi reformues duhet të orientohet drejt këtij qëllimi fundor: Të rritet mirëqenia e qytetarëve”, tha Zv/Kryeministrja.
Prej vitesh strukturat e sistemit shëndetësor nuk janë rishikuar për t’ju përgjigjur në strukturë dhe funksione reformave të ndërmarra në sistemin shëndetësor.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.