“Regjistri Qendror i Llogarive Bankare”, nisma futet me procedurë të përshpejtuar në Kuvend! Miratimi pritet me 10 dhjetor

Kuvendi do të shqyrtojë me procedurë të përshpejtuar, me qëllim miratimin brenda këtij viti të projektligjit “Për regjistrin qendror të llogarive bankare”.  Vendimi parashikon se shqyrtimi në komisionin përgjegjës për Ekonominë dhe Financat të bëhet në datat 3-8 dhjetor 2020.

Propozimi i amendamenteve në komisionin përgjegjës duhet të të bëhet brenda datës 3 dhjetor 2020 ndërsa shqyrtimi në seancë plenare do të bëhet në datën 10 dhjetor 2020.

Shqipëria po bëhet gati të krijojë një regjistër qendror për të gjithë llogaritë bankare. Nisma është në proces konsultimi publik dhe vjen në një kohë kur vendi po merr masa për të dalë nga ajo që njihet si “lista gri” e vendeve me probleme në transparencën financiare.

Çfarë është Regjistri Qendror i Llogarive Bankare?

Regjistri Qendror i Llogarive Bankare është një sistem qendror elektronik i mbajtësve të llogarive bankare si dhe kasetave të sigurisë, në të cilin regjistrohen të dhënat e raportuara nga institucionet financare. Nëpërmjet këtij database-i të dhënash, organet kompetente do të mund të parandalojnë dhe identifikojnë çdo veprimtari të paligjshme financiare të individëve, personave fizikë, juridikë, apo organizmave ligjorë. Ky regjistër përfshin jo vetëm llogaritë bankare të individëve apo subjekteve, por edhe kasetat e sigurisë të mbajtura nga institucionet financiare apo nga vetë individët, e thënë ndryshe, “kasafortat”. Të dhënat që ky regjistër do të “filtrojë” janë të dhënat identifikuese të personit apo subjektit posedues të llogarisë apo kasetës së sigurisë, numri i llogarisë, historiku i llogarisë bankare, etj.

Sipas projektligjit të publikuar në Konsultimet Publike, Sistemi i regjistrit do të ndërtohet nga Agjencia Kombëtare për Shoqërinë e Informacionit dhe do të administrohet nga Drejtoria e Përgjithshme e Tatimeve.

Ky regjistër do të shërbejë si rregullator i të drejtave dhe detyrimeve për krijimin, përdorimin dhe funksionimin e regjistrit qendror të llogarive bankare dhe kasetave të sigurisë. Nëpërmjet filtrimit të të dhënave që ky regjistër do të mbajë, zbulimi, identifikimi dhe hetimi i veprimtarisë kriminale do të jetë një proces më i thjeshtëzuar. Nga ana tjetër, këtu përfshihet edhe  ndjekja penale e autorëve të veprave penale, zbulimi, gjurmimi apo identifikimi i pasurive të dyshuara me origjinë nga veprimtari kriminale si dhe detyrimet tatimore.

Kush do të ketë akses në Regjistrin Qendror të Llogarive Bankare?

Një nga pikat më delikatë të projektligjit e që pritet të krijojë diskutime gjatë shqyrtimit në Kuvend pritet të jetë ajo e aksesit në këtë regjistër dhe mënyrës sesi do të ruhen këto të dhëna sensitive.

Organet kompetente që do të kenë akses të drejtëpërdrejtë, në kohë reale dhe pa filtra  në Regjistrin Qendror të Llogarive Bankare janë Drejtoria e Përgjithshme e Tatimeve si dhe Shërbimi Informativ i Shtetit.

Për më shumë lexo edhe:

Regjistri qendror/ ‘Të japësh llogari’ për llogaritë

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.