Regjistrimet te Mjekësia – Gjata: Janë plotësuar 80% të kuotave, nuk ndryshojnë tarifat
Universiteti i Mjekësisë ka rritur kuotat për këtë vit duke qenë se ka plotësuar edhe kriteret që e mundësojnë një gjë të tillë. Por nëse ju referohemi tarifave që aplikon ky universitet nuk ka një rritje të tyre. Kështu është shprehur rektori i këtij universiteti për televizionin SCAN.
“Tarifat e Universitetit të Mjekësisë nuk kanë ndryshuar që nga krijimi i këtij universiteti janë këto tarifa që janë sivjet pra janë 45 mijë lekë të reja, janë këto mjekësia, farmacia, stomatologjia dhe e kanë pak më të ulët 40 mijë lekë këto degët e infermierisë mos gaboj. Ne këtë vit kemi rritur numrin e kuotave në krahasim me vjet për shkak të rritjes së kapaciteteve që kemi si universitet”.
Në universitetin e Mjekësisë këtë vit është rihapur dega e Shëndetit Publik por ende nuk janë plotësuar kuotat, aktualisht janë kryer vetëm pesë regjistrime.
“Degët e tjera të gjitha kanë kuota të hapura përveç mjekësisë por sasia e kuotave është shumë e ulët, ndërsa shëndeti publik, fizioterapia, imazheria, teknik laboratori dhe logopedia kanë ende kuota të lira dhe kjo ka ardhur pasi studentët kanë preferuar të zgjedhin degët më të kërkuara të universitetit”.
Kur ka mbetur akoma edhe një javë nga përmbyllja e fazës së parë të regjistrimeve në universitete, në atë të Mjekësisë janë plotësuar rreth 80% të kuotave. Nëse deri në fazën e fundit të regjistrimeve do të ketë ende kuota të lira do ti propozohet Ministrisë së Arsimit që të bëhet regjistrimi i lirë sipas listës së fituesve në bazë të renditjes.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.