Regjistrimi i tokave bujqësore – Lame në Gjirokastër: Pas 30 vjetësh, drejt finalizimit
Pas 30 vitesh që ka nisur si proces tashmë është duke u finalizuar regjistrimi i tokave bujqësore.
Drejtori i Përgjithshëm i Kadastrës, Artan Lame tha nga qyteti i Gjirokastrës se tashmë pas shumë vitesh është drejt përfundimit procesi i regjistrimit të takove bujqësore.
“Për dy vjet bëjmë 30 vjetorin e procesit për regjistrimin e tokave bujqësore. Procesi i regjistrimit të tokave në fshat është pothuajse në nivelin gjysëm për gjysëm, që do thotë gjysma e familjeve fshatare e kanë tokën të paregjistruar, që do të thotë e ka të mbyllur derën e shtetit për të marrë një subvencion, për të marrë një kredi apo edhe ta shesi. Gjirokstra ka avancuar në pjesën e regjistrimit të tokave, dhe jemi në fazën e mbylljes së këtij procesi” – tha Artan Lame.
Ai shtoi se janë 2500 pasuri të regjistruara në tre zona kadastrale siç janë Zhulati, Fushbardha dhe Taroninë. Sipas njoftimit, Zhulati për shkak edhe të kontekstit historik që ka është i përfshirë edhe në programin e 100 fshatrave, ndaj regjistrimi i tokës ishte më emergjent.
Lame foli edhe për procesin e legalizimeve të pallateve pa leje, i cili vazhdoi të insistojë që duhet bashkëpunim mes banorëve të pallatit dhe Kadastrës. Lame dha eksperiencën për Tiranë, që falë bashkëpunimit me banorët janë legalizuar 140 pallate.
Për sa i përket legalizimit në zonat e mbrojtura, Lame tha “Legalizim në zonën e mbrojtur të UNESCO nuk mund të bëhen, aq më tepër kur shtesat apo ndërtimet nuk kanë lidhje me arkitekturën e vjetër”, duke shtuar se duhen të përshtaten edhe nëse ato janë bërë.
Një tjetër problem për qytetin e Gjirokastrës është edhe regjistrimi i banesave të vjetra. “Ka banesa me dokumente që në kohën e Sulltan Hamitit, të cilat ende nuk janë regjistruar”– tha Lame, duke vënë theksin edhe tek një problem shumë të rëndësishëm siç është Hartografia. Përmes një harte të grisur në dorë, Lame tha se aty ishin janë pronat dhe pronarët e Gjirokastrës. Sipas tij, kjo ishte një sfidë për të kaluar nga kopja e një harte të grisur në sistemin digjital.
“Tre dekada po mundohemi të bëjmë letra dhe hiç. 80% e pasurive janë regjistruara me probleme, shumica e hartave janë në gjendje të tmerrshme. Janë investuar 150 milionë euro në këto 30 vjet dhe kjo është situata. Kemi keq menaxhim. Ka qenë mungesë totale e dëshirës për ti dhënë zgjidhje themeleve të një vendi” -tha Lame.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.