Rehabilitimi i zonës së ish NSHRAK-ut/Përfundon këndi i 30-të rekreativ. Veliaj: Ndërhyrje në çdo lagje të Tiranës
Nga një hapësirë e degraduar, pjesa mes bllokut të pallateve në rrugën “Shefqet Musaraj”, në zonën e njohur si ish NSHRAK-u, i është kthyer banorëve të zonës, si një kënd rekreativ, e pajisur me infrastrukturën e duhur.
Kryetari i Bashkisë së Tiranës, Erion Veliaj i shoqëruar edhe nga zëvendësministrja e Mjedisit, Ornela Çuçi, pa nga afër transformimin duke thënë se Bashkia do të vijojë punën me shtimin e hapësirave të tilla, që jo vetëm ia rrisin vlerën zonës, por edhe krijojnë mundësi pushimi dhe shlodhje për të gjithë banorët.
“Ky është vetëm këndi i 30-të, por Tirana ka nevojë për 300. Sigurisht, krahasuar me zero jemi 30 herë më mirë, por krahasuar me ambicien që kemi, duhet të bëjmë edhe 10 herë më shumë”, u shpreh Veliaj.
Kryebashkiaku Veliaj nënvizoi se ndërkohë që bashkia bën rehabilitimin e hapësirave mes lagjeve, vetë banorët kanë në dorë që duke zgjedhur administratorin, të bëjnë rikonstruksionin e fasadave të pallateve.
“Thirrja ime për këto komunitete është tani siç bëmë këtë, hajde bëjmë edhe fasadat e pallateve, sidomos pallatet e vjetra që kanë nevojë për një dorë, për një kapotë, për një fasadë shumë më elegante, por sigurisht edhe në kursim të energjisë! Nëse mblidhen banorët, bëjmë një këshillë të komunitetit, zgjedhin një administrator, administratori më pas vjen në Bashki, merr një fond me të cilën rregullon dhe sistemon pallatet, nuk ka asnjë arsye pse të mos jemi edhe ne si jashtë shtetit”, deklaroi Veliaj.
Zëvendësministrja e Mjedisit, Ornela Çuçi, e cila është banore e këtij blloku banimi bëri thirrje banorëve të mbajnë pastër mjedisin përreth.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.