Rehabilitohet parku në Shkodër, bashkëfinancuar nga qeveritë Zvicerane dhe Austriake
Kryetarja e Bashkisë Voltana Ademi dhe Ambasadori zviceran Adrian Maître përuruan përfundimin e punimeve në parkun “Vaso Kadija” në Shkodër.
Projekti për rikualifikimin u quajt “100 drita për të gjithë” dhe pati një buxhet prej 53 mijë euro. Parku mbulon një zonë të gjerë prej 4700 metra katrorë ku përfshihen hapësira për të gjitha llojet e moshave dhe ku mund të mbahen një larmishmëri aktivitetesh.
“Qytetet tona kanë nevojë më shumë se kurrë për hapësira shlodhëse, argëtuese dhe kulturore. Në shumë qendra urbane në Shqipëri qytetarët po rizbulojnë hapësirat e përbashkëta publike, dhe se si të krijojnë një ndjesi krenarie dhe përkatësie”, tha Ambasadori zviceran në Shqipëri Adrian Maitre.
“Një përfitim i shtuar nga ky bashkëpunim: bashkitë ushtrohen se si të identifikojnë nevojat komunitare, ku të kërkojnë për fonde, dhe si të zbatojnë projekte të përbashkëta. Kjo ndihmon bashkitë në forcimin e kapaciteteve për të thithur fonde të ardhshme – si ato që vijnë nga BE”, shtoi Ambasadori Maître.
Kjo ndërhyrje është një nga disa projekte të financuara nga qeveritë e Zvicrës dhe të Austrisë.
Programi synon që nëpërmjet këtyre projekteve të rris financimet e donatorëve kryesisht nga Bashkimi Evropian, gjithashtu mbështet reformën e zhvillimit rajonal në vend dhe synon të ulë pabarazitë në Shqipëri në mënyrë që rajone të caktuara të përparojnë dhe të sigurojnë kushte më të mira sociale dhe ekonomike për qytetarët.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.