Reklamuesit do të investojnë 40.2% të buxheteve të tyre në internet gjatë 2018-s
Reklamuesit do të shpenzojnë 40.2 për qind të buxheteve të tyre në reklamat online këtë vit, krahasuar me 37.6 për qind në vitin 2017, sipas agjencisë së njohur të reklamave, Zenith.
Rritja e shpenzimeve është pjesë e procesit të transformimit dixhital në botë, ku reklamuesit po investojnë më shumë në teknologji dhe inovacione për revolucionarizuar marrëdhëniet e tyre me konsumatorët.
Rritja e reklamave në Internet po nxitet nga reklamat sociale dhe shfaqjet e videove, si ato që gjenden në Facebook dhe YouTube.
Besimi në tregun e reklamave globale po përmirësohet me shpejtësi. Në dhjetor Zenith parashikonte që shpenzimet globale të reklamave do të rriteshin me 4.1 për qind në 2018, në fund të intervalit të rritjes vjetore prej 4-5 për qind që tregu ka mbajtur që nga viti 2011.
Zenith tani pret që tregu të rritet me 4.6 për qind këtë vit, falë veçanërisht rritjes së përmirësuar ekonomike në Kinë dhe Argjentinë.
Në Australi, shpenzimet totale të reklamave parashikohet të rriten me 2.6 për qind në 16 miliardë dollarë këtë vit.
Parashikimet globale të Zenith për 2019 dhe 2020 janë gjithashtu mbi parashikimet e bëra tre muaj më parë, edhe pse jo aq shumë. Zenith parashikon rritje prej 4.4 për qind në vitin 2019 dhe rritje prej 4.3 për qind në vitin 2020, të dy parashikimet janë rritur me 0.2 pikë përqindjeje.
“Tregu global i reklamave u rrit me katër për qind vitin e kaluar”, tha Jonathan Barnard, kreu i parashikimit të Zenith.
“Ne tani presim që ajo të rritet ndjeshëm më shpejt këtë vit, të nxitur nga Lojërat Olimpike Dimërore, Kupa Botërore e Futbollit dhe zgjedhjet afatmesme të SHBA”.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.