Rekord ankesash nga punonjësit – COVID-19/ Mars-Prill, 50 % e ankimimeve të vitit 2019

Në dy muajt e shpalljes së gjendjes së emergjencës në vendin tonë si pasojë e COVID-19, janë regjistruar rekord ankesash nga punonjësit pranë Inspektoriatit Shtetëror të Punës. Burime zyrtare pranë këtij institucioni, bëjnë me dije për TV SCAN, se vetëm gjatë periudhës Mars-Prill janë regjistruar 50 për qind e totalit të të gjithë ankesave që rezultuar në vitin 2019.

Kështu, në total pranë këtij institucioni janë depozituar 440 ankesa të cilat kanë të bëjnë direkt me marrëdhëniet e punësimit. Shumë prej tyre lidhen me largime të padrejta nga vendi i punës, denoncime për mospagesë të sigurimeve shoqërore dhe shëndetësore.

Gjatë kësaj periudhe për shkak të masave të marra nga qeveria ndaj COVID-19, ku shumica e bizneseve u mbyllën, punëdhënësit janë detyruar që të bëjnë shkurtime stafi, gjë që ka sjellë pakënaqësi tek punonjësit. Ndërkohë që me sa duket një numër i konsiderueshëm prej tyre u është përgjigjur edhe apelit të kryeministrit për të denoncuar punëdhënësit për informalitetin në punë, me qëllim që të mund të përfitonin pagën e luftës.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.