Rekord daljesh gjatë Janarit! Instat: 531 mijë shqiptarë dolën nga kufijtë, në rritje me 17%
Janari i këtij viti regjistron numrin e dytë më të lartë të daljeve të shtetasve shqiptarë jashtë territorit të vendit, që prej vitit 2016, kur edhe datojnë të dhënat e Instat të detajuara.
Janari 2020 është muaji me numrin më të lartë të daljeve, po të përjashtojmë muajin gusht të çdo viti, dhe shtatorin e 2019-ës.
Bëhet fjalë për rreth 531 mijë shtetas shqiptarë që kanë dalë jashtë territorit të vendit, në rritje me 17% krahasuar me Janarin e vitit paraardhës.
Të dhënat zyrtare të Institutit të Statistikave në vendin tonë tregojnë se, nga rreth 842 mijë shtetas në total që kanë dalë nga Shqipëria në janar, pra si të huaj ashtu edhe shqiptarë, 661 mijë janë kryer nëpërmjet tokës, pra 79% kanë qënë dalje nga kufijtë tokësore, ku padiskutim që pjesa më e madhe janë largime drejt Greqisë, duke llogaritur numrin e lartë të emigrantëve shqiptarë në vend.
Në terma mujorë, rritja e daljeve nga toka fiksohet në rreth 25%, dhe në rreth 10% nga ajri. Një tjetër e dhënë e Instat sa i përket turizimit gjatë janarit tregon se, numri i të huajve që kanë vizituar Shqipërinë për qëllime biznesi apo profesionale gjatë Janarit është rritur me 53.1%, duke e çuar në total shifrën në rreth 7200 individë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.