Rekord infektimesh me COVID në Britani – Londra regjistron shkallën më të lartë të të prekurve

Britania ka raportuar 122,186 raste të tjera të koronavirusit në 24 orët e fundit, duke tejkaluar 120,000 raste ditore për herë të parë që nga fillimi i pandemisë. Shifrat e fundit e çuan numrin e përgjithshëm të rasteve të koronavirusit në vend në 11,891,292.

Vendi raportoi gjithashtu 137 vdekje të tjera të lidhura me koronavirusin. Numri i përgjithshëm i këtyre vdekjeve në Britani tani ka arritur në 147,857, me 8,240 pacientë COVID-19 ende në spital.

23,719 raste të tjera Omicron janë konfirmuar në Britani, rritja më e madhe ditore që nga zbulimi i variantit të COVID-19 në vend, duke e çuar numrin total të rasteve të Omicron në 114,625, deklaroi Agjencia e Sigurisë Shëndetësore në Mbretërinë e Bashkuar (UKHSA). Sidoqoftë, ekspertët thanë se ka të ngjarë të ketë qindra mijëra infeksione në ditë, ku shumë prej tyre mungojnë në sistem.

Shifrat e fundit erdhën pasi të dhënat treguan se rreth një në 20 njerëz në Londër kishte COVID në javën deri më 19 dhjetor, përqindja më e lartë për çdo rajon anglez.

Zyra për Statistikat Kombëtare tha se rezultatet e saj kryesore të një sondazhi kombëtar treguan se kryeqyteti britanik kishte shkallën më të lartë të virusit në vend. Rezultati u bazua në të dhënat e mbledhura midis 13 dhe 19 dhjetorit.

Në Angli, Zyra e Statistikave tha se rreth 1,544,600 kanë pasur COVID-19 javën e kaluar, me 2.83 për qind të popullsisë që ka rezultuar pozitive. Kjo shifër është e barabartë me 1 në 35 njerëz në të gjithë Anglinë që kanë virusin.

Më shumë se 89 për qind e njerëzve të moshës 12 vjeç e lart në Britani kanë marrë dozën e parë të vaksinës dhe rreth 82 për qind i kanë marrë të dyja dozat, sipas shifrave të fundit. Më shumë se 56 për qind kanë marrë injeksione përforcuese, ose dozën e tretë të një vaksine kundër koronavirusit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.