Rekord me energjinë e rinovueshme – Shqipëria është e 3-ta në Europë, pas Norvegjisë dhe Islandës
Shqipëria është vend i 3-të në Europë sa i përket energjisë së rinovueshme. Sipas Eurostat, që ka përpunuar të dhënat e vitit 2016, me 86% të energjisë së prodhuar nga burime të rinovueshme, Shqipëria është e treta në Europë pas Norvegjisë dhe Islandës. Vendi ynë ndërkohë është bindshëm përtej mesatares europiane që fiksohet në 30%.
Në këtë tendencë ndikon fakti që thuajse e gjithë energjia e prodhuar në vend, vjen nga uji, ndërkohë që në Europë termocentralet dhe kryesisht energjia bërthamore janë një problem gjithmonë e më i madh. Vendet e tjera të rajonit ndërkohë, janë shumë larg normës së 86%. Mali i Zi është ndjekësi më i afërt i Shqipërisë në këtë drejtim, me 51% të energjisë së rinovueshme mbi totalin e energjisë së prodhuar në vend.
Në nivel europian, energjia e prodhuar nga burimet hidrike zë 36.99% të totalit të energjisë së rinovueshme, ndërkohë që pjesën tjetër e zë energjia e prodhuar nga era, dielli apo burime të tjera. Vetëm 5 shtete europiane kanë më shumë se gjysmën e energjisë së prodhuar nga burime të rinovueshme.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.