Rekord për të premten e zezë – Radhë të gjata në të ftohtë për të kryer blerjet
E premtja e zezë, dita e blerje të mëdha, tashmë është kthyer në një eveniment edhe përtej Shteteve të Bashkuara të Amerikës. Në thuajse çdo cep të globit, blerësit janë dyndur të Premten për të bërë blerjet e tyre, kryesisht pajisje elektronike. Por sërish, blerësit amerikanë mbajnë vendin e parë. Ata kanë krijuar radhë të gjata nëpër dyqane, në pritje të uljeve drastike, të cilat vijnë vetëm një herë në vit, pikërisht të premten pas ditës së falënderimeve.
Pamjet e këtyre radhëve të gjata, në shumë vende edhe në kushte të vështira atmosferike, si i ftohti, janë treguesi më i besueshëm i një ekonomie të shëndoshë. “Bleva një xhaketë, të lehtë dhe me kapuç. Ishte 80 dollarë. Ishte një ujdi e mirë. Gëzuar Krishtlindjet”-thotë një qytetar finlandez i cili jeton në Manhatan. Ende nuk janë bërë bilancet, pasi zbritjet priten të vazhdojnë edhe gjatë ditëve që pasojë të Premten e zezë, por një pjesë e aktorëve të tregut shprehen të bindur se ky vit do të regjistrojë një rekord historik.
Gjatë viteve të fundit ka pasur një rritje të qëndrueshme të shitjeve prej 15% në vit, dhe ky vit pritet ta tejkalojë këtë normë. Por, nga ana tjetër, shitësit e mëdhenj amerikan, si Macy`s, Penney apo Target raportuan një rënie të Premten me 1% deri në 3%. E premtja e zezë është aplikuar edhe në Kinë, apo Afrikë të jugut, ku situata është thuajse e njëjtë, zbritje drastike dhe dyndje nëpër dyqane.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.