Rekord rastesh të reja në Gjermani/ Gati 1700 infektime të reja në 24 orë, shifra më e lartë në 4 muaj
Gjermania regjistron numrin më të lartë të infektimeve ditore me covid-19 në 4 muaj. Të dhënat më të fundit nga vendi flasin për 1693 raste të reja në 24 orë, që është edhe shifra më e lartë ditore që prej datës 25 prill, duke e çuar totalin në 226.700 raste.
Pavarësisht numrit të lartë të rasteve ditore, raportohet për vetëm një fatalitet, duke e çuar në total numrin e vdekjeve nga virusi në 9236 raste. Në Europë rastet ditore po rriten me ritme mjaft të shpejta. Franca, Spanja dhe Gjermania janë vendet më problematike.
Shumë shtete po rivendosin masat parandaluese për të ndaluar përhapjen e virusit. Në Gjermani një pjesë e madhe e rasteve të reja të regjistruara vijnë nga eventet familjare dhe aktivitetet e argëtimit.
Në një mbledhje me partinë e saj, kancelarja Merkel deklaroi se, rritja e rasteve është shqetësuese, dhe për momentin e menaxhueshme. Për këtë arsye, nuk ka vend për masa të reja shtrenguese.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.