Rekordet e shqiptarëve në Europë – Raporti i “KE” për vizat, të parët në 5 klasifikime, nga 6 gjithsej
Komisioni Europian në publikimin më të fundit për liberalizimin e vizave, ku në analizë merren 8 shtete, përfshirë vendin tonë, figurojnë edhe disa të dhëna mjaft interesante. Por, ajo që bën çudi, është fakti se, shqiptarët kryesojnë thuajse çdo indikator dhe tabelë, duke mbajtur rekordin absolut.
Duke filluar që në fazën e parë, refuzimin, shqiptarët janë të parët në renditje, me 30.305 refuzime gjatë vitit të kaluar, duke lënë pas të gjitha vendet e tjera me radhë.
Me 33400 shtetas shqiptarë të paligjshëm në një prej vendeve të zonës shengen gjatë 2016-ës, shqiptarët kryesojnë edhe renditjen e paligjshme duke qëndruar në krye të listës me 8 vende.
Padiskutim që shqiptarët janë edhe në krye të tabelës së vendeve me numrin më të lartë të kërkesave për azil, plot 30840 në një prej vendeve të zonës shengen gjatë 2016-ës, thotë Komisioni Europian në raportin më të fundit.
Të dhënat e 6 muajve të parë të këtij viti konfirmojnë se, shqiptarët vazhdojnë të mbeten në krye të kësaj liste. Shqiptarët shënojnë edhe dy rekorde të tjera, atë të numrit më të lartë të qytetarëve të rikthyer me 41 mijë, dhe atë të numrit më të lartë të shtetasve të detyruar që të rikthehen, 31.900 të tillë.
Vetëm në një prej indikatorëve, atë të sigurisë, Shqipëria nuk mban kryesimin e tabelës, por renditet e dyta, paçka se me një diferencë mjaft të vogël me vendin e parë, Serbinë.
Kjo listë i referohet numrit të personave me mandate arresti, vetëm 268 shqiptarë, nga 297 serbë. Pra, pavarësisht se, Komisioni Europian ka ruajtur statusin e këtyre vendeve për liberalizimin e vizave, Shqipëria mban rekord negativ në 5 nga 6 indikatorët.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.