Remitancat – BB: Armenia një nga 3 vendet kryesore në Europë e Azinë Qendrore. Shqipëria pas Malit të Zi dhe Serbisë

Armenia është një nga vendet kryesore në Europë dhe Azinë Qendrore sa i përket remitancave të dërguara në shtëpi nga emigrantët. Sipas përditësimit të Bankës Botërore, remitancat përbëjnë 13.9 për qind të PBB-së së Armenisë.

Vendet kryesore në rajon janë Kirgistani (37.1%) dhe Taxhikistani (28%). Remitancat e Gjeorgjisë përbëjnë 12% të PBB-së, pasuar nga Mali i Zi (9.6%), Serbia (9%), Shqipëria (8.7%), Ukraina (7.2%), Uzbekistani (3.9%) dhe Bullgaria (3.6% ).

Sipas Shërbimit Kombëtar Statistikor të Armenisë, remitancat private të dërguara nëpërmjet bankave për qëllime jo-komerciale, tejkaluan 1 miliardë dollarë në 8 muajt e parë të këtij viti, nga 160 milionë dollarë që ishte në po të njëjtën periudhë të vitit të kaluar. Në vitin 2016 një total prej 1 532.8 miliardë dollarësh u transferua në Armeni (një rënie prej 6% nga një vit më parë) dhe 817 milionë dollarë u transferuan nga Armenia në vendet e tjera (një rritje prej 7.3%).

Banka Botërore thotë se remitancat në rajon janë relativisht të larta. Ato kanë një ndikim të moderuar pozitiv në rritjen ekonomike afatgjatë të familjeve më të varfra dhe mund të përmirësojnë aksesin në tregjet ndërkombëtare të kapitalit. Kthimi i emigrantëve në vendet e tyre mund të mbështesë zhvillimin ekonomik, veçanërisht kur ata sjellin kapital dhe njohuri.

Në të njëjtën kohë, ekspertët e BB paralajmërojnë se në perspektivën afatgjatë, varësia nga remitancat mund të zvogëlojë stabilitetin makroekonomik dhe konkurrencën e rajonit. Për të adresuar këto probleme, vendet duhet të zbatojnë reforma që synojnë zhvillimin e sektorit financiar dhe liberalizimin e tregjeve të mallrave dhe të punës.

Genta Dobra/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.