Remitancat në rritje – 3% më shumë për 9-mujorin 2017
Dërgesat e emigrantëve u rritën sërish në tremujorin e tretë të vitit. Sipas të dhënave nga Banka e Shqipërisë, remitancat për tremujorin e tretë kishin vlerën e 166 milionë eurove, rreth gjashtë milionë euro më shumë krahasuar me të njëjtën periudhë të vitit të kaluar. Remitancat po rezistojnë në rritje edhe në vitet e fundit, megjithëse përmasat e rritjes tashmë janë modeste.
Në nëntë muaj, emigrantët kontribuan në ekonominë shqiptare me 464 milionë euro, shifër kjo 3% më e lartë krahasuar me të njëjtën periudhë të një viti më parë. Pas vitit 2015, remitancat kanë nisur një përtëritje të lehtë, pas rënies së ndjeshme në vitet e para të krizës ekonomike të Eurozonës. Megjithë këto përmirësime, shifrat janë larg rekordit prej 950 milionë eurosh në vit që regjistrohej një dekadë më parë.
Tendenca rënëse e remitancave është një fenomen i natyrshëm, që lidhet me shkëputjen graduale të lidhjeve të emigrantëve që e kanë ndërtuar jetën e tyre jashtë. Megjithatë, në Shqipëri ky proces po rezulton i ngadaltë, edhe për shkak të varësisë së lartë që një pjesë e madhe e familjeve kanë nga këto të ardhura.
Banka e Shqipërisë vlerëson se remitancat përdoren kryesisht për konsum, mjekim, arsim, por edhe për investime të pasuri të paluajtshme.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.