EKSKLUZIVE/ Renditja e universiteteve private në Shqipëri. Cili fiton më shumë? Cili ka rritjen më të madhe? Cili ka më shumë studentë, pedagogë?

Nga “Scan Intelligence Unit”

Në shumë fusha të ekonomisë sektori privat ka arritur stade të larta, duke rritur cilësinë dhe duke krijuar vlera. Matësi kryesor për ta vërtetuar këtë sigurisht që është kënaqësia e konsumatorit dhe dyndja e tyre për të marrë shërbimet apo produktet e ofruara. Në këtë aspekt, një zhvillim shumë të madh kanë marrë gjatë viteve të fundit edhe universitetet private. Universitetet private në vendin tonë përfaqësojnë sot një treg të mirëfilltë. “Scan Intelligence Unit” ka bërë një analizë të zgjeruar të tregut të universiteteve private në vendin tonë, duke u përqëndruar tek bilancet e kompanive që zotërojnë këto institucione, nga viti 2015 deri në vitin 2019, te krahasimi i numrit të studentëve të regjistruar në universitetet private kryesore në Shqipëri, numri i stafit akademik, programeve, apo raportet mes këtyre elementëve.

Universitetet private sipas fitimit dhe humbjeve

“Scan Intelligence Unit” ka mbledhur të dhëna nga Qendra Kombëtare e Biznesit mbi të ardhurat vjetore për secilën nga kompanitë që zotërojnë universitetet private kryesore në Shqipëri, që nga viti 2015 deri në vitin 2019. Siç tregohet dhe nga të dhënat e pasqyruara në grafik, universiteti që ka patur fitimiet më të larta gjatë vitit 2019 është “Aldent”, me 210 milionë lekë. Në vend të dytë ndjek “Albanian University” me 138 mln lekë. Në vend të tretë ndërkohë renditet “Marin Barleti”, me 67 mln lekë. Në total, 13 universitete private regjistriohen me fitim, ndërsa 4 me humbje. Në këtë listë figurojnë vetëm kompanitë mëmë të këtyre universiteteve, të cilat mund të përfshijnë edhe burime të tjera të ardhurash veç tarifave të regjistrimit të studentëve, apo edhe nivele më të ulta shkollimi, si kurse, gjimnaz, shkollë 9-vjeçare, etj. Ndër të tjera, në listë mungojnë disa prej universiteteve private të cilat figurojnë si jo-fitimprurëse, e për rrjedhojë nuk kanë detyrim ligjor për të pasur bilanc , paçka se janë të detyruara të kenë numër NIPT-i. Për një pjesë të vogël ndërkohë ka mangësi në QKB apo parregullsi dokumentacioni, kryesishst si pasojë e kalimit të pronësisë gjatë viteve të fundit.

Renditja e IAL jo-publike sipas numrit të studentëve

Bazuar në të dhënat e mundësuara nga Ministria e Arsimit mbi numrin e të regjistruarve ne universitetet private shohim se vlerën më të madhe e ka “Albanian University’ me një numër prej 4077 të regjistruarish për vitin akademik 2019-2020, i pasuar nga “Universiteti Europian i Tiranës” dhe Universiteti “Zoja e Këshillit të Mirë”. Vlerat më të ulta të numrit të studentëve të regjistruar e shohim te Akademia “IVODENT” dhe te Akademia e Filmit dhe Multimedias “ MARUBI”. Numri total i studentëvë të regjistruar në universitetet kryesore private për vitin akademik 2019-2020 arrin në 25462 studentë të regjistruar.

Tregu, me tendenca decentralizimi

Sa i përket rritjes së numrit të studentëve në harkun kohor 2015-2019, nga përpunimi i të dhënave dhe nga grafiku shohim se ndër 10 të parat për numër studentësh, rritjen më të madhe e regjistron “Luarasi” dhe “Epoka”. Në terma absolutë ndërkohë, “Kolegji Profesional i Tiranës” ka patur rritjen më të lartë, i ndjekur nga “Canadian Institute of Technology” – CIT dhe nga “Kolegji Universitar Reald”. Dy universitetet me numrin më të lartë të studentëve për vitin 2019 ndërkohë, “Albanian University” si dhe “Universiteti Europian i Tiranës”, regjistrojnë rënie në numër regjistrimesh në harkun e 5 viteve të fundit, me 48% në rastin e “Albanian University”, si dhe me rreth 16% në rastin e “Universitetit Europian të Tiranës”, paçka se vijojnë të jenë të parat, gjë që sinjalizon se gjatë viteve të fundit ky treg ka pasur tendenca drejt decentralizimit, pra të reduktimit gradual të hegjemonisë së më të “mëdhenjve”. Në rritje regjistrohen edhe “Polis”, “Universiteti Mesdhetar”, “Aldent” si dhe “Zoja e Këshillit të Mirë”. Nga lista prej 23 institucionesh të arsimit të lartë jo-publik, vetëm 7 prej tyre janë me rënie të numrit të studentëve, e ndër to, vetëm 2 të parat, e lartpërmendura, janë pjesë e “Top 10”

Renditja sipas numrit të stafit akademik

Sipas shifrave të Ministrisë së Arsimit mbi numrin e stafit akademik për IAL jo-publike, numrin më të madh të stafit prej 523 pjestarësh e ka Universiteti “Zoja e Këshillit të Mirë”, i ndjekur nga “Albanian University” me 388 dhe nga “Universiteti Europian i Tiranës” me 257 . Numrin më të vogël të stafit akademik, siç e tregon dhe grafiku, e ka Akademia “MARUBI” me 7 pedagogë dhe Akademia “IVODENT” me 13 pedagogë. Si numër stafi akademik figurojnë jo vetëm pedagogët e brendshëm, por edhe ata të jashtëm, për të arritur në një total.

“Scan Intelligence Unit” gjithashtu ka analizuar të dhënat sipas raportit student-staf akademik, si dhe raportin student-program. Rezultatet tregojnë se Universiteti “Epoka” ka raportin më të ulët, me 17 studentë për një pjesëtar të stafit akademik, dhe raportin më të lartë e ka “Nehemia”, ku një studenti i takon 1 pedagog.

Renditja sipas numrit të programeve që ofrojnë

Gjithashtu një komponent tjetër i analizuar është dhë numri i programeve që ofron secili nga universitetet private, ku nga të dhënat rezulton se numrin më të madh të programeve e ofron “Universiteti Europian i Tiranës” me 65 programe ndjekur nga “Albanian University” me 41 programe dhe “Marin Barleti” me 30 programe studimi. Sa i përket numrit më të vogël të programeve të ofruara për studentët, “IVODENT” dhe “EPPITECH” kanë numrin më të vogël me nga 1 program studimi. Këto të dhëna i referohen vitit akademik 2019-2020.

Gjatë përpunimit të të dhënave mbi raportin program-student, raporti më i ulët regjistrohet në Universitetin “Zoja e Këshillit të Mirë” 1:226, dhe raporti më i lartë regjistrohet te Akademia e Filmit dhe e Multimedias “MARUBI” 1:2.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.