Rënia e interesave në Eurozonë – Do i kursejë qeverive 140 mld euro, që i duhen për shpenzime
Kostot rekord të ulëta të huamarrjes dhe rënia e pagesave të borxhit, mund t’i kursejë Eurozonës 140 miliardë euro deri në fund të vitit 2021, duke mundësuar para për projekte nga infrastruktura e deri te mbrojtja ndaj ndryshimit klimatik. Rënia e këtij viti e kostove të huamarrjes ka fuqizuar pozitën e financave të Bashkimit Europian, duke ulur interesat që vendet paguajnë dhe mundësuar qeveritë që të rifinancojnë më lirë borxhin e vjetër.
Sipas analistëve, kjo fuqizon argumentet që Eurozona të shpenzojë “fortë” për të dalë nga vështirësitë ekonomike. Ndërkohë që Gjermania po afron drejt recesionit dhe Banka Qendrore Europiane nuk ka më mjete në dispozicion, ekonomistët presin tashmë që shpenzimet qeveritare të nxisin ekonominë dhe inflacionin. Me yieldet aktualë, qeveritë e Eurozonës do kursejnë në mesatare nga pagesat e interesit këtë vit 0.1% të Produktit të Brendshëm Bruto, apo rreth 12 miliardë euro, sipas analistëve të Standard & Poor’s.
Kursimet do të rriten në 0.25% të PBB në 2020-ën dhe 0.8% në vitin 2021, sipas studimit. Totali i kursimeve nga rënia e pagesës së interesave mund të arrijë në 140 miliardë euro. “Ky lehtësim është i rëndësishëm. Që prej 2013-ës, rënia e pagesave të interesave në raport me PBB, kryesisht në vende si Spanja dhe Italia, ka bërë që Qeveritë të kenë vend për manovrim”, deklaroi S&P.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.