Reputacioni i japonezëve në rrezik – Mazda, Suzuki, Yamaha dhe Nissan, mashtrojnë për konsumin dhe ndotjen
Mazda, Suzuki dhe Yamaha kanë ndërmarrë testimet të gabuara të konsumit dhe ndotjes në automjetet e tyre, sipas Ministrisë së Transportit në Japoni. Ky është raporti i fundit mbi falsifikimin e të dhënave në Japoni, që ka prishur imazhin e industrisë së vendit, të njohur për cilësi të lartë dhe prodhim efiçent.
Zbulimet erdhën pas një hetimi të brendshëm të urdhëruar nga ministria, pas mashtrimit në testime të Subari dhe Nissan. Zëdhënësit e Mazda, Suzuki dhe Yamaha, konfirmuan se kanë bërë testime të pasakta.
“Për sa i përket hetimeve të ndotjes, janë ndërmarrë veprime jo të sakta. Kërkojmë ndjesë”, deklaroi Yamaha. Aksionet e Mazda ranë me më shumë se 1.8%, niveli më i ulët në 4 javë, ndërsa Suzuki humbi më shumë se 5.2%, që është performance më e dobët që prej Nëntorit 2016. Yamaha, ra me 4% në vlerë tregu.
Në muajin Korrik, Nissan pranoi se ka matur në mënyrë jo të saktë ndotjen dhe konsumin për 19 modele të automjeteve që ka shitur në Japoni.
Kobe Steel, Mitsubishi Materials dhe Toray Industries, që janë furnitorët kryesorë të prodhuesve global, pranuan se kanë falsifikuar të dhënat vitin e kaluar.
Shumë prej prodhuesve të makinave, që kanë pësuar rënie të shitjeve, janë gjendur gjithashtu përballë presioneve për tarifa në Shtetet e Bashkuara.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.