Reshje bore, ARRSH-drejtuesve të mjeteve: Akset ku duhet të përdorni goma dimërore dhe zinxhirë
Autoriteti Rrugor Shqiptar paralajmëron të gjithë drejtuesit e mjeteve se temperaturat do të jenë shumë të ulëta dhe se priten reshje bore në zonat malore. Kështu është e nevojshme që në disa akse rrugore të përdoren goma dimërore dhe zinxhirë.
“Rekomandohet që në Segmentin Librazhd-Korçë-Kapshticë, Korçë-Ersekë qarkullimi i mjeteve të bëhet me goma dimërore gjatë natës, apo edhe me zinxhir nëse do të njoftojmë se është i nevojshëm në orët në vazhdim, pasi pritet që të ketë reshje bore dhe temperatura shumë të ulëta. Apel për përdoruesit e rrugës: I rikujtojmë që duhet të tregojnë kujdes dhe të respektojnë sinjalistikën rrugore. Të vendosin gomat dimërore në segmentet rrugore që kemi njoftuar, të respektojnë Patrullën e Policisë në terren dhe të lëvizin me shpejtësi të reduktuar”, thuhet në njoftimin e ARRSH.
Nga ana tjetër Instituti i Gjeoshkencave, Energjisë, Ujit dhe Mjedisit parashikon se temperaturat nga e mërkura do të pësojnë një rritje të ndjeshme krahasuar me ditën e martë, duke u rritur me 5 gradë në vlerat minimale. Gjithashtu pritet që të ketë reshje dëbore dhe shiu në qarqe të ndryshme.
“Sot pasdite (e martë dt.08) nuk priten reshje. Nesër (e mërkurë dt.09) priten reshje mesatare, deri lokalisht intensive në disa qarqe (siç tregohet në tabelë, respektivisht për secilin qark). Ato do të jenë në formë dëbore në gjysmën Lindore të vendit dhe në terrenet malore. Në pjesën Perëndimore, ato do të jenë fillimisht në formë dëbore, por më pas priten edhe reshje shiu (ose shi i përzier me dëborë). Nesër (e mërkurë dt.09) temperaturat minimale dhe maksimale të ajrit pritet të arrijnë:
në bregdet: 0 / 8 °C
në vendet e ulëta: – 1 / 6 °C
në vendet malore: – 8 / – 1 °C”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.