Reshjet e dendura sjellin prurje të mëdha. KESH fillon shkarkimin e kontrolluar të ujërave në Hidrocentralin e Vaut të Dejës
Koorporata Elektroenergjitike Shqiptare(KESH) ka bërë një njoftim në ditën e sotme se reshejt e dendura të shiu kanë krijuar prurje të mëdha në Hidrocentralet e Komanit dhe Vaut të Dejës, duke forcuar në këtë mënyrë shkarkimin e Plotave.
Për këtë arsye Koorporata është vënë në lëvizje për të menaxhuar situatën duke garantuar sigurinë e plotë të digave dhe shmangien e impaktit negativ të shkarkimeve në zonën e nën-Shkodrës.
Kështu sipas njoftimit kanë filluar shkarkimet e kontrolluara në Hidrocentralin e Vaut të Dejës me synim parandalimin e shkarkimeve të mëdha që mund të krijojnë probleme në momentet e pikut.
Njoftimi i plotë
Reshjet e shiut me intensitet të lartë gjatë ditëve të fundit, si dhe reshjet e pritshme në ditët në vijim, në ujëmbledhësin e kaskadës së lumit Drin kanë rritur ndjeshëm nivelet e liqeneve në Hidrocentralet e Koman dhe Vau i Dejës, e pritet të kalojnë limitet e parashikuara nga Rregullorja e Shkarkimit të Plotave.
Nisur nga kjo situate Administratori i KESH z. Benet Beci ka thirrur në një takim Sekretariatin Teknik të Komisionit te Posaçëm të Trajtimit të Plotave, per trajtimin e prurjeve natyrore në kaskadë, në përputhje me Rregulloren e shkarkimit të Plotave.
Në vijim të vendimeve të Sekretariatit Teknik dhe Komisionit të Posaçëm të Trajtimit të Plotave , KESH ka marrë të gjitha masat e nevojshme për të menaxhuar situatën duke garantuar sigurinë e plotë të digave dhe shmangien e impaktit negativ të shkarkimeve në zonën e nën-Shkodrës.
Si rezultat, KESH ka filluar nga data 28 Dhjetor shkarkimet e kontrolluara në Hidrocentralin e Vaut të Dejës, me synim parandalimin e shkarkimeve të mëdha që mund të krijojnë problem në momentet e pikut të prurjeve natyrore. Shkarkimet po menaxhohen me kujdes duke ndjekur në dinamike zhvillimet metoerologjike dhe bazuar në informacionin aktual të prurjeve, nuk përbejnë rrezik dhe nuk do të kënë impakt negativ në zonën e kanalit të shkarkimit. KESH për herë të parë po kryen administrimin e integruar të nivelit të prurjeve natyrore në kaskadë, nivelin e shkarkimeve nga HEC Vau i Dejës, nivelin e Liqenit të Shkodrës, nivelin e lumenjëve Buna, Kir, Gjadër, si dhe ndërveprimet midis tyre.
Ditën e djeshme, Administratori i KESH z. Beci së bashku me stafin përgjegjës ka inspektuar nga afër situatën e shkarkimeve në Hidrocentralin e Vaut të Dejës dhe zonën e nën Shkodrës, duke u siguruar që Korporata është në gadishmëri të plotë e ka marrë të gjitha masat e nevojshme për menaxhimin e prurjeve në ditët në vijim. KESH ka qenë dhe është në komunikim të vazhdueshëm me autoritetet përkatëse qendrore dhe vendore duke dhënë informacion në kohë reale rreth prurjeve dhe shkarkimeve.
Aktualisht KESH po prodhon me kapacitet të plotë në të Hidrocentralet e Komanit dhe Vaut të Dejës duke siguruar furnizim të plotë për Operatorin e Shpërndarjes, si dhe po trajton për qëllime rezerve prurjet në liqenin e HEC Fierzë.
Të dhënat e kaskadës për ditën e sotme Dt. 30.12.2020, ora 10.00 në foton më poshtë.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.