Resortet në Divjakë – Klosi: Zonë me përparësi zhvillimi, por jo në zonat e mbrojtura
Divjaka është shpallur një nga 16 zonat me përparësi zhvillim turizmi, ndërkohë që qeveria po e orienton këtë zhvillim përmes hoteleve me 4 dhe 5 yje. Gjatë mbledhjes së Komitetit Rajonal të Turizmit për Qarkut Fier, ministri i Turizmit dhe Mjedisit, Blendi Klosi tha se ndërtimi në zonat e mbrojtura do të shmanget në masën 100%. Ndërkohë që, këto deklarata vijnë pas projektit të prezantuar nga biznesmeni kosovar Behgjet Pacolli, i cili u krijua nga mjedisorët për dëmtim të parkut Divjakë-Karavasta, nëse do të ndërtohej.
“Përsa i përket zonës së Semanit dhe plazhit të Divjakës janë në planet e qeverisë për t’u afruar si zona me potenciale të jashtëzakonshme të zhvillimit turistik për kategorinë e hoteleve me 4 dhe 5 yje. Zona e Divjakës është në planet e një zhvillimi turistik por që në bazë të përpjekjeve vazhdueshme që ka bërë kryetari i bashkisë, drejtori Agjencisë së Zonave të Mbrojtura, i gjithë sistemi i ministrisë së Mjedisit, jemi në fazën që kemi reduktuar maksimalisht, në mos 100% ndërhyrjen e biznesit të zhvillimit të hotelerisë në zonën e mbrojtur”.
Klosi shpreson në një vazhdim të sezonit pa shira, në mënyrë që të arrihet objekti i numrit të turistëve.
Sikur ne të kemi një sezon të gushtit pa shira dhe kjo duhet thënë, ne padyshim do të jemi në në arritje maksimale të objektivit tonë që në Shqipëri në sezonin turistik 2018 të kemi 10 deri në 15% turistë më shumë. Dhe po të realizojmë këtë numër turistësh, me një investim që ka bërë bashkia , të ardhurat për vetë komunitetin rriten shumë më shumë
Gjatë takimit, Klosi kërkoi nga drejtuesit vendorë që të shtojnë masat për të realizuar sigurinë në plazhe dhe minimizimin e problematikave që lidhen me mjedisin dhe shërbimet.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.