Resortet që do të sjellin turizmin elitar në Shqipëri!

Nga Elisabeta Dosku

Nga kabinat e plazhit, tek dhomat banesave private të lëshuara me qira nga banorët e zonave turistike, duke vijuar tek hotelet me standarde të cunguara, turizmi shqiptar ka avancuar ndër vite, dhe tashmë duket se janë hedhur piketat e para të ofrimit të një turizmi që po përshkruhet si cilësor, luksoz apo elitar.

Kundrejt hoteleve që i kanë vetëpërcaktuar yjet në fasadë, por që shpesh nuk i gjen as në “Google“, apo në guidat turistike më të thjeshta, janë ngritur e po ngrihen edhe disa hotele apo resorte që bëjnë maksimumin për të ofruar shërbimin e një cilësie të lartë për ata që etiketohen si klientët elitarë.

Është fjala për ata klientë apo pushues që zgjedhin të shpenzojnë shumë për ditët e qëndrimit të tyre në një vend të caktuar, duke kërkuar një mentalitet të ri në shërbimet që marrin dhe në axhendën e periudhës së pushimeve. Dy projekte të tilla gjigante, të ndërthurura në shërbime, që pritet të thithin më shumë turistë cilësorë janë në ndërtim e sipër, duke shënuar një gur të ri kilometrik në ciklin e turizmit shqiptar.

Megjithatë nga ana tjetër e medaljes qëndron infrastruktura problematike rrugore, mungesa e investimeve përtej dyerve të resorteve, kryesisht në zonat malore, plazhet e patrajtuara në zonat bregdetare, që nuk janë ndihmuese për zhvillimin e turizmit elitar, në raport me potencialet që ka Shqipëria, nisur edhe nga pozita gjeografike apo klima që ofron.

Gjendja e turizmit shqiptar

Ndërsa objektivi i qeverisë është që në 5 vitet e ardhshme të sjellë në Shqipëri 10 milionë turistë, aktualisht vendi unë ofon vetëm turizëm sezonal, konkretisht tuizmin bregdetar dhe malor, përkatësisht në verë dhe dimër.

Po të bëjmë një analizë të ofertës turistike, pa frikë mund të vëmë re se turizmi shqiptar është në nivel amator. Në zonat malore funksion më së shumti me bujtina apo hotele modeste, që përpos dhomës, maksimalisht edhe mëngjesit, nuk ofrojnë asgjë.

Përveç Dardhës, në qarkun e Korçës që ofron një pistë modeste, në zonat e tjera turistike malore, turistët shqiptarë apo të huaj, mund të bëjnë vetëm ecje në natyrë, të shijojnë bukuritë e vendit dhe ushqimin e zonës, por janë të limituar në aktivitete, pasi nga ana e qeverisë nuk është investuar aspak, në fusha sportive, pista për ski, sporte ujore, etj. Dhe duhet theksuar se aq sa është bërë, ka qenë vullneti i banorëve për të shfrytëzuar bukuritë e natyrës dhe për të rritur të ardhurat e tyre.

Ndërsa po të flasim për turizmin bregdetar, sërish pjesa më e madhe funksion me hotele modeste dhe shtëpi që janë kthyer në mundësi përfitimi për banorët e zonave, duke mos paguar asnjë detyrim ndaj shtetit. Por kaq! Ofrohen dhomat e shtëpive, të mobiluara modestisht dhe bregdeti që e ka dhënë natyra.

Apo dhomat e hoteleve dhe mëngjesi. Pjesa më e madhe e hoteleve nuk kanë paketa për turistët, shërbimin all inclusive, nuk kanë infopoint-e, bashkëpunim me agjencitë turistike apo shërbime nga aeroporti. Megjithatë janë njësi akomodimi që rrinë plot, për shkak të numrit të ulët të shtretërve në dispozion, numrit të lartë të pushuesve vendas dhe dhe rritjes së numrit të turistëve.

Madje edhe çmimet e aplikuara për natë janë në disporpocion me shërbimin e ofruar. Ndërsa vitet e fundit, është investuar për të targetuar ata turistë që deri më tani nuk e kanë gjetur veten. Janë disa hotele-resorte që ofrojnë më shumë se çfarë ofron mbi 90 për qind e njësive të akomodimit në vend, por megjithatë në raport me vendet e rajonit që kanë një kulturë turizmi të hershme dhe të konsoliduar, jemi shumë pas, pavarësisht avantazhit të natyrës. Sipas statistikave zyrtare të INSTAT, gjatë vitit 2017 në Shqipëri hynë 5.1 milionë të huaj, me një rritje prej 8.1% në krahasim me vitin e mëparshëm.

Gati gjysma e tyre erdhën për qëllime turistike. Pjesa më e madhe e turistëve kanë qenë nga Maqedonia, Greqia, Italia, Gjermania, Polonia, Anglia, Çekia, etj. Të dhënat zyrtare nga Ministria e Turizmit, tregojnë se viti 2017 u mbyll me mbi 1.5 miliardë euro të ardhura nga turizmi. Në sektorin e turizmit operojnë aktualisht 3791 struktura akomoduese. Numri i dhomave është 28.680, ndërkohë që numri i shtetërve është 66.794.

Pjesa që hotelet zënë në raport me llojet e tjera të njësive akomoduese është 65%. Hotelet dhe strukturat e tjera akomoduese prodhojnë përqindjen më të madhe të të ardhurave në sektorin e turizmit dhe marrin të ardhura të larta për vizitorë për netë-qëndrimi duke mbështetur një sezon më të gjatë dhe krijuar vende pune.

Politikat lehtësuese të qeverisë

Vitet e fundit, qeveria ka kthyer sytë nga turizmi, duke e parë si sektor me potenciale të pashfrytëzuara dhe që ka hapësirë të zhvillohet më shumë, përmes investimeve gjeneraliste, më të domosdoshme. Fillimisht me rinovimin e disa qendrave turistike përmes projektit të rilindjes urbane, e më tej duke aplikuar lehtësi fiskale. Një vit më parë qeveria vendosi uljen e TVSH-së për akomodimin në sektorin e turizmit në 6 për qind.

Ndërsa në paketën fiskale të qershorit 2018, e cila u miratua në qeveri, vendosi uljen e TVSH-së në po këtë nivel edhe për agroturizmin, uljen e tatimit fitimit për furnizimin e shërbimit të restoranteve dhe akomodimin në 5 për qind, si dhe përjashtimin nga taksa e ndikimit në infrastrukturë për investimet në agrofermë, për t’i dhënë nxitje zhvillimit të kësaj dege. Po ashtu, këtë vit, qeveria ka miratuar vendimin për statusin special për investitorët që do të ndërtojnë në Shqipëri hotele me 4 dhe 5 yje.

Për të marrë këtë status duhet që vlera e investimit për ndërtimin e strukturave akomoduese të jetë mbi 8 milionë euro për hotelet me 4 yje dhe 15 milionë euro për hotelet me 5 yje. Sipas ligjit shkalla e reduktuar e Tatimit mbi Vlerën e Shtuar 6 % aplikohet për çdo furnizim shërbimi të ofruar brenda strukturave akomoduese “hotel/resort me pesë yje, status special” dhe që janë mbajtës të një marke tregtare të regjistruar dhe njohur ndërkombëtarisht “brand name”.

Gjithashtu, strukturat akomoduese “hotel/resort me katër dhe pesë yje, status special”, do të përjashtohen nga tatimi mbi fitimin. Strukturat akomoduese “hotel/resort me katër dhe pesë yje, status special” dhe që janë mbajtës të një marke tregtare të regjistruar ndërkombëtarisht “brand name”, do përjashtohen nga Tatim Fitimi për një periudhë 10 vjeçare. Efektet e përjashtimit nisin nga momenti i fillimit të veprimtarisë ekonomike të strukturës akomoduese, por jo më vonë se 3 vjet nga marrja e statusit, me kushtin që ata ta kenë përfituar statusin special deri në dhjetor të vitit 2024.

Gjithashtu, bazuar në ligjin “Për sistemin e taksave vendore”, përjashtohen nga taksa mbi ndërtesat strukturat akomoduese “hotel/resort me katër dhe pesë yje, status special”, dhe që janë mbajtës të një marke tregtare të regjistruar dhe njohur ndërkombëtarisht “brand name”. Për të marrë këtë status special, që e lehtëson nga taksat për disa vite, investitori duhet që të mos ketë qenë i dënuar.

Ndërsa marrëveshja zgjidhet menjëherë, në rastet kur autoriteti ose institucionet e ngarkuara nga ai për monitorimin e marrëveshjes konstatojnë se; falimenton ose ka kaluar në procedurë likuidimi. Me këto lehtësi qeveria shqiptare pret që në Shqipëri të afrohen investitorë të mëdhenj.

Kategorizimi i hoteleve, mbetet në letër

Nga ana tjetër ende ka një mungesë vullneti për të bërë kategorizimin e hoteleve që janë ekzistente aktualisht, megjithëse ligji është miratuar në vitin 2016, nuk kanë dalë vendimet e qeverisë që saktësojnë zbatimin e tij.

Sipas ligjit, klasifikimi bëhet në bazë të pikëve për çdo njësi akomoduese dhe hotelet nga 2-5 yje, duhet të plotësojnë përkatësisht nga 151-252 kritere të detyrueshme. Ligji përcakton disa kategori, sipas pikëve të marra, si: “Bujtinë” Standard; “Fjetinë” Standard, Komfort;“Kamping” Standard; “Hotel” Dy yje, tre yje, katër yje, pesë yje; “Motel” Standard, Komfort, Superior; “Resort” tre yje, katër yje, pesë yje; “Qendër kurative” Dy yje, tre yje, katër yje, pesë yje;“Fjetje dhe mëngjes” (B&B) Standard, Komfort, Superior.

Aktualisht të gjitha hotelet, përpos atyre që mbajnë emra ndërkombëtarë dhe që i kanë të adaptuara rregullat nga marka e tyre, pjesa tjetër i kanë vendosur vetë yjet. Kjo gjë krijon konfuzion tek pushuesit dhe kryesisht tek turistët kur prenotojnë dhe pagujnë për një hotel me 4 apo 5 yje dhe nuk gjejnë shërbimin që mendojnë apo që kërkojnë. Disa  nga  çështjet  sfiduese  që  mbeten  në  axhendën  e  qeverisë, të përcaktuara në Strategjinë Kombëtare për Zhvillimin e Qëndrueshëm të Turizmit 2018-2021 janë:  qartësimi  i  pronësisë  së tokave, formalizimi dhe standardizimi i shërbimeve, qasja në shërbime  publike dhe menaxhimi i mbetjeve.

Një nga vështirësitë strukturore të zhvillimit të sektorit të turizmit në Shqipëri vazhdon të mbetet koordinimi dhe planifikimi i integruar mes institucioneve të ndryshme. Ndonëse treguesit e viteve të fundit dëshmojnë për një trend pozitiv, sezonaliteti vazhdon të jetë një ndër sfidat e mëdha të sektorit të turizmit. Në të njëjtën kohë, sektori përballet me kërkesën gjithnjë në rritje për personel të kualifikuar dhe shërbime më cilësore.

Resortet elitare në ndërtim

Në Shqipëri aktualisht janë në ndërtim dy resorte të përmasave gjigante dhe që synojnë të konkurrojnë me resortet më cilësore  në rajon dhe të klasifikohen të parat në zgjedhjet e turistëve.  “Green Coast Resort”, një investim gjigant që po bëhet në brigjet e detit Jon, në zonën e Palasës dhe “San Pietro Hotel & Residences” një investim tjetër madhor në Gjirin e Lalzit. Të dyja resortet kanë avantazh kryesor mungesën e konkurrencës në zonat ku po ndërtohen, por edhe në të gjithë vendin, duke qenë se janë të vetmet të këtij formati.  Por cila do të jetë strategjia e tyre për të sjellë turistë elitarë në vendin tonë dhe çfarë ofrojnë më shumë nga sa ofron aktualisht sektori i tuizmit në vend?

“Green Coast Resort“ do të jetë një nga projektet më të mëdha dhe më të mira jo vetëm në Shqipëri, por edhe në rajon.  Projekti sjell një stil jete të cilësisë së lartë nëpërmjet shërbimeve dhe ambienteve të “Green Coast Hotel”, shëtitores me njësi shërbimi dhe platformës së sporteve dhe të argëtimit. “Targeti ynë janë të gjithë ata, shqiptarë ose vizitorë të huaj, të cilët janë në kërkim të turizmit elitar, shërbimeve në standard të lartë dhe përjetimit të një eksperience unike në Mesdhe”, shpjegon Alketa Shulla, drejtore marketingu, “Balfin Real Estate“.  Sa i përket resortit i cili po ndërtohet aktualisht  në  plazhin e Gjirit të Lalzit,  “San Pietro”, do të shtrihet në një truall me siperfaqe prej 350.000m2 dhe 1500 m vijë bregdetare, në një plazh eskluziv vetëm për pushuesit e tij.

“Me zonën rezidenciale luksoze dhe hotelin me 5 yje, ky kompleks do të shndërrohet në destinacionin kryesor turistik të individëve dhe familjeve qe kërkojnë siguri, cilësi ndërtimi dhe bukuri natyrore,  jo vetëm nga Shqiperia, por dhe rajoni e me gjerë”, shprehet  Ermira Brozi, drejtore e Marketingut dhe Shitjeve, “Edil al“.

Sa i përket shërbimeve, “Green Coast Hotel” do të jetë një markë hotelerie me 5 yje, pjesë e një rrjeti të njohur ndërkombëtar dhe që ka si qëllim të sjellë standardin e munguar në turizëm.  “Aktualisht ne jemi duke negociuar me disa operatorë ndërkombëtarë dhe shumë shpejt do të finalizojmë përzgjedhjen e operatorit, i cili do të menaxhojë hotelin. Që në fillesat e këtij projekti ne jemi këshilluar dhe vazhdojmë të këshillohemi nga kompania konsulente “Horwath HTL“, lider botëror dhe me eksperiencë në fushën e hotelerisë dhe turizmit”, thekson Alketa Shulla, drejtore marketingu, “Balfin Real Estate“.

Ajo bën me dije se vetëm hoteli do të jetë i shtrirë në një sipërfaqe prej rreth 15.000 m2, me 2 kate ndërtim, do të ofrojë struktura akomoduese në përputhje me kërkesën e pushuesve dhe cilësi të lartë shërbimi. “Të gjitha këto së bashku do të bëjnë që hoteli të jetë unik dhe të sjellë në Shqipëri një standard elitar të munguar deri tani. Ajo që ne synojmë është që të kemi një zgjatje të sezonit turistik përgjatë gjithë vitit, për të plotësuar kërkesën gjithmonë e në rritje”, shprehet znj. Shulla.

I njëjti synim është edhe nga drejtuesit e fshatit turistik “San Pietro”. Drejtoresha e Marketingut dhe Shitjeve në “Edil al“, vlerëson se aktualisht mungojnë strukturat që ofrojnë turizëm elitar, edhe pse disa hotele apo resorte vetëvlerësohen me pikët më maksimale.

“Në Shqipëri kemi shumë resorte në nivele amatoreske, ku çdo ndërtim me emrin bashkëkohor dhe me disa lehtësi në ambientet e tij, ka filluar të vetëquhet resort. Në fakt ky është koncepti shqiptar për resorted, por që është larg konceptit që ekziston në sektor sipas standardeve botërore”, shprehet znj. Brozi .

Sipas saj, megjithë kategoritë e ndryshme të strukturave akomoduese, duket se ajo e restoreve reale është pjesa që i mungon vendit, por që si një shtet që aspiron një zhvillim domethënës të sektorit, duhet ta plotësojë.

“Për herë të parë në Shqipëri me një shtrirje kaq të madhe gjeografike, “Edil al” dhe “Concord Investment” përkatësisht subjekt ndertues dhe subjekt investitori sjellin “San Pietro” me një koncept inovator, që  ndërthur banimin dhe turizmin, ndikon në zhvillimin e zonës dhe sjell pikërisht atë që mungon: turizmin elitar. Është projekti më i madh në llojin e tij, jo vetëm në Shqipëri, por edhe në rajonin e Ballkanit”, nënvizon znj. Brozi.

Hotelet luksoze në zonat turistike

Në zonat turistike të vendit operojnë disa hotele dhe resorte luksoze, ku disa prej tyre i përmbushin standardet për 5 yje dhe disa të tjerë, në mungesë të legjislacionit, i kanë vendosur vetë, por megjithatë ofrojnë shërbim më cilësor në raport me njësitë e tjera.

Kështu, në qytetin e Durrësit, në zonën e Golemit prej një viti është në fuksion të turizmit “Prestige Resort”, një emër ndërkombëtar, i cili i shtrirë në një hapësirë prej 80 mijë m2, ofron shërbim me 5 yje për klientët. Një tjetër hotel i kësaj kategorie, po në qytetin e Durrësit është hotel “Adriatik” si dhe “Premium Beach Hotel” i hapur së fundmi. Ndërsa në jugun e vendit operojnë disa njësi luksoze si, “Drimadhes In”, “Splendor”, “Morina Palace”, “Elysuim”, “Altea”, “Sarajet e Pashait”, “Rrapos Resort”, “Miamar” “Paradise Hotel”. Këto njësi ofrojnë akomodim luksoz, ushqim, pishinë, por sërish nuk përmbushin kriteret sipas yjeve të vendosura apo kriteret që duhet të ketë një resort në shtrirje, në ofrimin e aktiviteteve si palestra, fusha sportive, sporte ujore, etj. Nuk ofrojnë paketa për turistët, ndërsa yjet sërish janë vendosur në mënyrë autodidakte.

Hotelet luksoze në kryeqytet

Po t’i hedhim një sy faqes së internetit luxuryhotelsguides.com, që është edhe një lloj guide për të huajt që duan të vijnë në Shqipëri, renditen hotelet më luksoze në kryeqytet, ku vetëm 6 prej tyre rezultojnë të jenë me 5 yje. Siç janë, “The Plaza Tirana“, hotel“ Boutique“,“Rogner“,“Sheraton“, hotel “Vivi La Vita“ dhe “Tirana Back Packer hostel“ ndërsa lista vijon me hotele me 4 yje, 3 yje dhe më tej.  Po të vëmë re, hotelet më luksoze janë ato që sot përdoren më së shumti për klientët elitarë, kryesisht për qëllime biznesi, që realisht ofrojnë shërbim cilësor dhe që përzgjidhen edhe për konferencat e shumta të aktiviteteve të administratës shtetërore, biznesit, shoqatave, etj.

Çmimet që ofrojnë hotelet dhe resortet të kategorizura apo vetëkategorizuara me 4-5 yje, shohim që çmimet janë shumë të larta në raport me shërbimin e ofruar, por edhe me çmimet në rajon. Në jugun e vendit çmimet variojnë nga 80 euro deri në 250 euro në pikun e sezonit turistik për një dhomë dyshe, me vetëm mëngjesin të përfshirë. Ajo që të bie në sy është se pavarësisht yjeve të vendosura nga hotelet, përshtypjet e pushuesve i rendisin ato në nivelin mesatar.

Ndërsa përpos çmimeve të kripura, nëse kërkon të prenotosh përmes platformës booking.com  vihet re se pjesa më e madhe e dhomave është e rezervuar gjatë sezonit turistik dhe ka hotele ku nuk mund të gjesh akomodim në asnjë datë. Ndërsa sa i përket hoteleve me 5 yje në plazhin e Durrësit, “Premium Beach Hotel” ofron çmim për natë mesatarisht rreth 138 euro me mëngjes dhe darkë të përfshirë,  për një dhomë standarde çift, pastaj ndryshon në varësi të kategorisë së dhomës dhe  pamjes;  “Prestige Resort” të njëjtën dhomë e ofron 120 euro/nata, me mëngjes, dhomën treshe 150 euro nata, apartament standard 200 euro nata dhe apartamentet ekzekutiv 220 euro nata.

Hotel “Adriatik” ofron çmime nga 79-111 euro nata me mëngjes të përfshirë për një çift dhe çmimi luhatet në varësi të dhomës dhe pamjes që ofron. Pra, po të bëjmë një analizë, turizmi bregdetar aktualisht ofron hotele lukzose që mund të numërohen me gishtat e duarve dhe që e kanë të pamundur të përballojnë apo tërheqin fluksin e turistëve elitarë që duan të eksplorojnë Shqipërinë, të cilët më së shumti funksionojnë me paketa të plota njëjavore dhe me një axhendë të detajuar aktivitetesh gjatë ditëve të qëndrimit. Sa i përket turizmit malor, ende nuk ka resorte apo hotele në nivele luksoze.

Ndërsa dy resortet në ndërtim synojnë të ofrojnë paketa të kompletuara për turistët dhe kanë nisur që herët përpjekjet në këtë drejtim. “Është pak shpejt për të folur konkretisht, por parimisht pjesa e hotelerisë do të ketë paketa të ndryshme qoftë për SPA, pishinën, shfaqjet e ndryshme apo restorantet, të cilat për rezidentët do të kenë çmime preferenciale.

Përsa i përket mënyrës së menaxhimit të hotelit, sigurisht që pjesë e terheqjes, sidomos në sezone të ndryshme, do të ketë oferta të ndryshme, qoftë 2 deri në 10 ditë me çdo gjë të përfshire ose e bazuar në ndonjë temë të veçantë (fundjavë pushimi dhe argëtimi në SPA dhe Casino, festat e fundvitit..etj)”, shpjegon drejtoresha e Marketingut dhe Shitjeve në “Edil al“, Ermira Brozi. Teksa flasim për çmimet, duket se këto resorte do të konkurrojnë ndjeshëm me ato në rajon.

“Sigurisht si në sektorin e shitjes dhe ne sektorin e hotelerisë duke qene se ofrohen cilësi të standarteve të larta, do të jenë çmime konkuruese, të  përballueshme për çdo kategori klientesh . Synimi ynë është të kemi nga ata klientë mesatarë, si dhe high e high end”, thekson ajo. Në të njëjtën fazë është edhe stafi i “Green Coast Resort”.  “Aktualisht jemi në fazën e gjetjes së agjencive me të cilat do të bashkëpunojmë në të ardhmen për ofrimin e paketave turistike. Niveli i parashikuar i çmimeve mund të themi që do të konkurrojë denjësisht simotrat e saj në rajonin e Mesdheut. Megjithatë kjo do të varet edhe nga operatori, i cili do të menaxhojë hotelin”, detajon Alketa Shulla, drejtore e Marketingut, “Balfin Real Estate“.

Ndikimi në ekonomi dhe punësim

Ditët e fundit, kryeministri Edi Rama dhe përfaqësues të qeverisë e kanë vënë theksin tek lehtësitë fiskale për hotelet me 4-5 yje. Arsyeja është tërheqja e investimeve të mëdha nga marka të njohura ndërkombëtare që do të kontribuojnë ndjeshëm në ekonominë e vendit dhe punësim. “E dini pse krijuam lehtësi për hotelet me 4-5 yje? Duam të tërheqim investime të huaja. Duam ta fusim Shqipërinë në hartën e turizmit elitar, ku zhpenzimet e atyre që vizitojnë Shqipërinë të jenë të larta, që vlera e shtuar të mbetet në vend” është shprehur ministri i Ekonomisë dhe Financave, Arben Ahmetaj.

Por nga këto politika nuk përfitojnë hotelet dhe resortët me 4-5 yje që janë në funksion apo që po ndërtohen aktualisht. Pasi statusi special i jepet një investimi të ri. Megjithatë kontributi i hoteleve luksoze aktualisht dhe resorteve në ndërtim, është dhe do të jetë tejet i lartë, si në gjenerimin e punësimit ashtu edhe në zhvillimin e ekonomive lokale. “Impakti real i këtij projekti turistik ka nisur që me fillimet e punimeve.

Për realizimin e “San Pietro Hotel & Residences” janë punësuar një numër i konsiderueshëm profesionistesh. Numri i personave që do të punësohen do të shumëfishohet që në momentin e inaugurimit të këtij resorti. Duke qenë se do jetë një nga resortet më të mëdha në Ballkan, pa dyshim që fluksi i lartë i turistëve do ketë një ndikim pozitiv në ekonominë e vendit”, shprehet Ermira Brozi.

Po ashtu, edhe zhvillimi i “Green Coast Resort” pritet të ndikojë në shndërrimin e zonës së Palasës dhe jo vetëm, nga një destinacion turistik veror në një destinacion të frekuentuar gjatë gjithë vitit.

“Përmirësimi i infrastrukturës, shërbimi cilësor nëpërmjet njësive të biznesit dhe hotelit, kombinuar me guida turistike, praktikimin e sporteve ujore e dimërore dhe ndërtimi i ambienteve të dedikuara sportive/rekreative do të sjellin në këtë zone, dhe në Shqipëri në përgjithësi, standardin e munguar në turizëm dhe rritjen e numrit të turistëve, si shqiptarë ashtu edhe të huaj. Një nga përgjegjësitë kryesore të këtij projekti është mbështetja e zhvillimit ekonomik dhe shoqëror të zonës, duke përmirësuar ndjeshëm aspektin turistik të saj”, thekson Alketa Shulla, drejtore marketingu, “Balfin Real Estate“.

Nga ana tjetër mendohet që projekti “Green Coast” të japë një kontribut  të madh në rritjen e punësimit, zhvillimin e kapaciteteve të zonës dhe standardit të profesionalizimit. “Kombinimi i standardeve ndërkombëtare të investimit me traditat lokale, prodhimet natyrale dhe mjedisin rrethues të zonës, do të sjellin një eksperiencë unike për të gjithë ata që do të vizitojnë Palasën. Sigurimi i burimeve të mjaftueshme njerëzore të kualifikuara, aftësimi profesional i tyre dhe krijimi i mundësive për zhvillim ekonomik të zonës do të bëjë që përveç përfshirjes së banorëve aktualë të zonës, t’u japë një arsye më tepër për t’u rikthyer në atdhe edhe atyre që kanë emigruar”, shton znj.Shulla.

Ajo bën me dije se për shkak të rëndësisë dhe impaktit në ekonominë dhe turizmin shqiptar, ky projekt gëzon edhe statusin “Investitor Strategjik me procedurë të veçantë”, me vendim të Këshillit të Ministrave.

Ky status nënkupton që investimi i kryer mbart një interes të lartë publik me kontribut në sektorin strategjik të turizmit, duke ndikuar në zhvillimin ekonomik vendor dhe rajonal, rritjen e konkurrencës, krijimin e një imazhi pozitiv në industrinë e turizmit në Shqipëri.

Menaxhimi dhe pronësia

Si do të funksionojë menaxhimi i hoteleve luksoze dhe a ka një ndarje nga pronësia? Të dy resortet ambicioze në ndërtim e kanë zgjidhur këtë çështje, ku menaxhimin ia kanë besuar një kompanie të specializuar.

“Menaxhimi dhe mirëmbajtja e pronës do të realizohet nga një kompani e specializuar në këtë fushë, e ndarë nga kompania investitore. Kjo kompani do të kryejë menaxhimin e ambienteve të përbashkëta në çdo aspekt të mirëfunksionimit të një jetese elitare dhe të sigurtë, duke ofruar shërbime cilësore për një bashkëjetesë sa më të mirë. Në çdo ditë të vitit do t’i kushtohet kujdes i veçantë mirëmbajtjes së ambienteve të posaçme 24 orë në ditë dhe siguri e plotë falë sistemit të monitorimit me kamera dhe kabinave me roje në pjesë të ndryshme të tij. Një ndër elementet kryesore dhe unike të një standardi me 5 yje është shërbimi i personalizuar “Buttler Service”, shërbim i dedikuar sipas nevojave të gjithsecilit” shpjegon Alketa Shulla, “Balfin Real Estate“.

Po ashtu edhe në kompleksin “San Pietro Hotel & Residences”, hoteli me 5 yje do të menaxhohet nga një emër ndërkombëtar në fushën e turizmit elitar “Meliá Hotels International”. Grupi spanjoll eshte i njohur për standardet e tij të larta, shërbimet cilësore, dhe resortet ekskluzive.

Ndërthurja, hotel dhe rezidencë banimi

Ndryshe nga çfarë është ofruar deri më tani, ku kemi parë vetëm modele resortesh për qëllime turizmi apo vetëm rezidenca banimi, dy projektet në ndërtim parashikojnë një ndërthyrje të të dy elementëve.

Resortet në brendësi do të ketë vila me fizionomi të ndryshme, apartamente, dyqane të cilat do të jenë në shitje apo do të lëshohen me qira.  Interesi për blerje dhe marrje me qira ka filluar edhe pse projektet janë në proces ndërtimi. “Interesi ka filluar që me startimin e ndërtimit të “San Pietro”, i cili ka filluar në prill 2017, tashmë pronotimet kanë filluar dhe është shitur 60% e gjithë resortit. Tashmë është duke marrë formën  më të dukshme, aktualisht është në fazën e tij të muraturës dhe pritet të përfundojë në mars 2019 duke akomoduar vizitorët e parë të resortit” thekson Ermira Brozi, “Edil al“.

Ndërsa synohet një klientelë me bazë të gjerë edhe jashtë kufijve të Shqipërisë. “Synimi ynë për këtë investim janë relativisht klientë mesatarë, si dhe high e high end. Klientë vendas dhe të huaj. Nga rajoni mund të përmendim Kosovë, Maqedoni, Mal i Zi por dhe spanjollë, italianë apo dhe vende te tjera ku “Melia Group“ njihet dhe ka klientelë.

Një risi mund të jenë dhe hungarezët, meqënese u hap linja low cost me Budapestin “Wizz Air”, thekson ajo. Procesi i shitjes ka nisur edhe në resortin “Green Coast”, ku sërish është shfaqur interes i lartë.  Alketa Shulla, drejtore e Marketingut në “Balfin Real Estate“ bën me dije se aktualisht po punohet me ritme shumë të shpejta që të mbyllet faza e parë e projektit dhe jetesa në resort të fillojë brenda këtij viti.

“Synimi ynë është të sigurojmë që jetesa në komunitet të jetë një përvojë unike. Duke u bërë pjesë e “Green Coast Resort”, gjithsecili do të bëhet pjesë e një komuniteti elitar, me status dhe privilegj, siguri maksimale, shërbime dhe facilitete të përzgjedhura. Ajo nënvizon se ndër avantazhet kryesore të këtij resorti është vendndodhja strategjike, ku përveç bukurisë së natyrës ka afërsi me pika të tjera turistike, si Vlora, Dhërmiu, Jala, Saranda, Butrinti etj, vende në të cilat praktikohen akoma artizanatet dhe janë të pasura me vlera historike e kulturore. Vendndodhja e resortit jep gjithashtu mundësitë për t’u bërë pjesë e aktiviteteve të ndryshme sportive si lundrimi, zhytja, rafting, parashutizmi apo eksplorimi i botës nënujore.

“Nëpërmjet strukturave të tij, resorti do të organizojë guida turistike dhe praktikimin e sporteve dimërore.  Ndërtimi i këtij projekti ka ecur me ritme të shpejta, por çfarë është më e rëndësishmja është që në arkitekturën e tij ndërthuren elementët e modernes me elementët e tradicionales”, shprehet znj.Shulla.

Green Coast Resort

“Green Coast Resort” i cili po ndërtohet nga “Balfin Group”, në brigjet e detit Jon, në një nga plazhet më të bukura të Rivierës Shqiptare, në zonën e Palasës, është investimi më i madh i grupit në fushën e turizmit, me një vlerë rreth 100 milionë euro. Si një nga resortet më të mira në rajon, kombinon elegancën e arkitekturës me vlerat e paçmuara të natyrës, historisë dhe kulturës.

Ky projekt, i cili po sjell një standard të lartë në strukturat akomoduese në turizmin bregdetar në Shqipëri, është i përbërë nga tre seksione: resorti (me vila dhe apartamente në shitje), shëtitorja buzë detit e cila do funksionojë si qendër argëtimi e biznesi dhe një hotel me 5 yje, i cili do të jetë një nga markat më të njohura botërore. Ky megaprojekt, i cili shtrihet në një sipërfaqe prej 20 hektarësh do të presë banorët e parë brenda vitit 2018, duke dorëzuar njësitë e para të banimit. Ndërkohë i gjithë projekti duke përfshirë edhe hotelin do të jetë plotësisht i përfunduar në vitin 2020.

San Pietro Hotel & Residences

“San Pietro Resort” në Gjirin e Lalzit, është një investim me vlerë 88 milionë euro, për të cilin është deklaruar se do të menaxhohet nga një emër ndërkombëtar, “Melia“, një eksperiencë e parë kjo për vendin tonë. Duke qenë se “San Pietro“ shtrihet në një truall relativisht shumë të madh 350.000m², firma ndërtuese dhe investituese e kanë ndarë atë në dy faza përfundimi.  Kompleksi “San Pietro” ka filluar ndërtimin në prill dhe ka avancuar në pjesën e hapjes së rrugëve dhe ndërtimit të vilave dhe palazinave. Aktualisht kantieri vazhdon e avancon, pasi po shfrytëzohet në maksimum koha e mirë përpara se të fillojë dimri.

Faza e parë, e cila zotëron gati 60% të projektit, përfundon në mars 2019 dhe faza tjetër që zotëron  pjesën tjetër, do të përfundojë në mars 2020. Projekti është i organizuar në vila, palazzina, godinat e shërbimeve në zonat e përbashkëta si dhe zona relaksi e kënde sportive. Të gjitha të përfshira nga rrjeti organik i rrugëve dhe gjelbërimi i bollshëm, i cili zë mbi 70% të truallit. Stili i përdorur është bashkëkohor me prekje mesdhetare. Një stil i tillë shprehet në fasadat e mëdha të xhamit, me lartësi kati, verandat e mëdha me pjergullat për hijezim, veshja me gur natyral dhe përdorimi i ngjyrave pastel, ku mbizotëron e bardha…

SCAN Magazine

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.