Revolucioni ‘pas kuintave’ – Si do të ndryshojë biznesi online në Europë?!
Pse për të njëjtin produkt ose shërbim ekzistojnë tarifa dhe renditje të ndryshme nëpër faqet e internetit të specializuara për këtë lloj biznesi online?! Pikërisht për të evituar këto lloj parregullsish këtë vit do të ndërmerren masa konkrete.
Bashkimi Europian ka vendosur të ndryshojë rregullat e lojës për të gjitha ato platforma digjitale që veprojnë si ndërmjetës për ata që shesin produkte ose shërbime në internet. Nga Google, Amazon, Alibaba, Ebay, Airbnb, Expedia, Booking, Tripadvisor, Deliveroo, Glovo doën, mbi shtatë mijë vendet e tregut të anketuar në Europë që nga 12 korriku do të duhet të jenë në përputhje me rregulloren 1150, të nisur në qershor 2019.
Komisioni dëshiron të promovojë “drejtësi dhe transparencë” për bizneset, veçanërisht për më të voglat, të cilat përdorin këto mënyra shitjesh digjitale për të arritur tek klientët, por që në realitet nuk i njohin si duhet rregullat dhe mekanizmat. Si pasojë, mekanizmat e renditjes, kushtet e shërbimit, procedurat për mbylljen e një profili nga kjo verë duhet të jenë të qarta, të kuptueshme dhe transparente. ‘Loja’ me kushte të barabarta, midis shitësit dhe tregut, si dhe eliminimi i asimetrive që i japin të dytës një fuqi të pakufishme mbi të parën, do të jenë objektivat e Brukselit.
Nga ana e klientit, mos prisni ndonjë trazirë. “Konsumatorët nuk do të shohin asgjë,” parashikon Werner Stengg, kreu i njësisë së tregtisë elektronike dhe platformës së Drejtorisë së Përgjithshme të Komisionit Europian (përgjegjës për rrjetet dhe teknologjinë). Masa do të hyjë në fuqi prapa skenës, në marrëdhëniet midis platformave dhe kompanive që i përdorin ato për të shitur mallra dhe shërbime në rrjet. Sipas Wired një pjesë e mirë e kompanive janë duke u përgatitur për këto ndryshime të cilat BE do t’i botojë në fund të prillit. (Wired)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.