Rezerva Federale merr një qëndrim më të ashpër ndaj inflacionit – Vendos të tërheqë stimujt më shpejt!

Rezerva Federale do të shkurtojë programin e saj stimulues më shpejt se sa ishte planifikuar, pasi ajo forcon reagimin e saj ndaj inflacionit në rritje. Banka qendrore amerikane kishte njoftuar tashmë se po zvogëlonte mbështetjen mujore, të prezantuar për të forcuar ekonominë gjatë pandemisë.

Por të mërkurën zyrtarët thanë se procesi do të përshpejtohej, duke sugjeruar se stimuli do të përfundojë deri në mars. Lëvizja hap derën për rritjen e normave të interesit në vitin 2022.

E ashtuquajtura grafiku i “pikë-pikës” i Rezervës Federale për rritjet e parashikuara të normave të interesit tregon se shumica e Komitetit Federal të Tregut të Hapur për vendosjen e normave pret tre rritje vitin e ardhshëm.

Kryetari i Rezervës Federale, Jerome Powell u shpreh se aktiviteti ekonomik është në rrugën e duhur për t’u zgjeruar me një ritëm të fuqishëm këtë vit, duke reflektuar përparimin në vaksinimet dhe rihapjen e ekonomisë dhe sipas tij aktualisht vendi po bën një përparim të shpejtë drejt punësimit maksimal.

Kërkesa mbeti “shumë e fortë”, megjithëse ardhja e variantit Omicron përbënte një rrezik për rimëkëmbjen, shtoi ai.

Zyrtarët parashikojnë se inflacioni do të jetë më i lartë vitin e ardhshëm nga sa kishin parashikuar më parë dhe se papunësia, masa tjetër e synuar nga Rezerva Federale, do të bjerë në 3.5%. Si rezultat, ata parashikojnë se normat bazë të interesit do të duhet të rriten nga nivelet aktuale afër zeros në 0.9% deri në fund të 2022. BBC

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.