Rezultatet gjermane në zgjedhjet e BE-së, përshpejtojnë largimin e Merkel
Partitë kryesore gjermane pësuan përsëri një disfatë rëndë në zgjedhjet parlamentare europiane, veçanërisht për socialdemokratët të cilët humbën ndjeshëm. Rezultati ndoshta mund të përshpejtojë largimin e Kancelares Angela Merkel.
Dy partitë kryesore të Gjermanisë morën një goditje tjetër të rëndësishme në zgjedhjet evropiane të dielën, pasi votuesit në vend, vazhduan të largoheshin nga qendra tradicionale politike. Një migrim i madh në Partinë e Gjelbër sugjeroi se elektorati po kërkon masa më të forta për të mbrojtur klimën.
Bashkimi Kristian Demokratik i Angela Merkel (CDU) dhe aleati i saj CSU arritën të fitonin vetëm 28% të votave në Gjermani, 7 pikë më pak nga zgjedhjet e Parlamentit Europian të 2014 dhe rezultati i tyre më i keq në zgjedhjet mbarëkombëtare. Partneri i saj i vogël i koalicionit, Partia Social Demokratike (SPD), megjithatë mundi të mblidhte vetëm 15.6%, një rënie prej 11 pikësh nga rezultati i saj 2014, duke e vënë atë vetëm në vendin e tretë.
Humbja e fundit për Social Demokratët e qendrës së majtë mund të jetë më e rëndësishmja për Merkelin. Rënia e SPD-së në vitet e fundit, me një përkeqësim të vazhdueshëm të rezultateve të zgjedhjeve, ka parë trazira në rritje brenda partisë, veçanërisht në anën e majtë të saj, ku pakënaqësia me koalicionin e madh CDU është rritur ndër vite.
Rezultati i të Dielës vetëm sa do ta përforcojë këtë ndjesi, të shumëfishuar nga humbja e madhe historike në zgjedhjet e Bremen-it, qyteti më i vogëli Gjermanisë, ku SPD është vendosur i dyti duke humbur fuqinë në këtë qytet për herë të parë në 7 dekada.
Burimi: DW
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.