Rezultati i BNP Paribas – Banka më e madhe në Francë raporton një fitim neto poshtë projeksioneve

Banka më e madhe në Francë, BNP Paribas, raportoi një fitim neto për tremujorin që rezultoi poshtë projeksioneve këtë javë, duke shkaktuar rënien e aksioneve të huadhënësit në një kohë të shitjes nën panik në të gjithë botën.  BNP Paribas rriti lehtë objektivin mbi përfitueshmërinë deri në 2020-ën, prej fuqizimit të ekonomisë europiane,  por kjo u injorua prej të dhënave të dobëta për tremujorin e katërt.

Fitimi neto ra në 1.43 miliardë euro gjatë tremujorit, nga 1.44 miliardë që ishte në të njëjtën periudhë një vit më parë dhe poshtë 1.60 miliardë euro që pritej nga analsitët. Të ardhurat ranë gjithashtu me 1.2% në 10.53 miliardë euro, pavarësisht se BNP Paribas rriti dividentin me 11.9%  nga viti i kaluar, në 3.02 euro për aksion.  Banka bëri të ditur se pret tashmë një kthim nga kapitali në sipër 10% në 2020-ën. Vlera në treg e huadhënësit francez ra me 3.5% në hapje të tregtisë europiane.

Të ardhurat në divizionin e bankingut të korporatave dhe institucional (CIB), ranë gjithashtu me 6.9%.  Të ardhurat nga tregtimi i titujve të borxhit ranë me 27.4%, ndërsa për titujt e kapitalit, pati rritje me 12.1%. Banka franceze mbiperformoi bankat kryesore në SHBA që raportuan mesatarisht një rënie në të ardhurat nga titujt e borxhit, valuta dhe lëndët e para në 31%. BNP Paribas bëri të ditur se synon të fitojë pjesë tregu ndërkohë që rivalët po tërhiqen nga bankingu i investimeve.  Banka ka nisur gjithashtu këtë vit një plan prej 3 miliardë eurosh për të sjellë teknologji të reja dixhitale, në përgjigje me ndryshimin e sjelljes së konsumatorëve.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.