Rezultati i “Monte dei Paschi” – Banka më e vjetër në botë publikon humbje në fund të 2017
Monte dei Paschi di Siena, banka e shpëtuar nga shteti italian, pësoi rënie gjatë tregtisë në Milano, pasi raportoi një humbje për tremujorin e katërt prej të ardhurave të dobëta dhe kostove të ristrukturimit. Vlera ne treg e bankës tregtare më të vjetër në botë, ra me 2.8% në 3.72 euro për aksion. Banka, që u rikthye në bursën e Milanos më 25 Tetor pas një përjashtimi 10-mujor, vlerësohet tashmë në 43% poshtë 6.49 euro për aksion që u pagua nga shteti për ta shpëtuar.
Sipas analistëve të bankës së investimeve Mediobanca, rezultati për tremujorin e katërt tregon se nuk do të jetë e lehtë që huadhënësi të rikthehet në përfitueshmëri dhe se duhet kohë që ristrukturimi të japë të mirat e veta. Monte dei Paschi, e cënuar nga kreditë e këqija dhe marrëveshjet derivative që nuk rezultuan me sukses, kërkoi ndihmë shtetërore vitin e kaluar pasi dështoi të gjenerojë fonde nga investitorë privatë.
Qeveria italiane ndërhyri për të shpëtuar bankën më të vjetër në botë gjatë verës së kaluar, duke injektuar 5.4 miliardë euro ndihmë. Banka ka shkurtuar 20% të fuqisë punëtore, ka mbyllur degë dhe planifikon të shesë 28.6 milordë euro kredi të këqija deri në vitin 2021. Huadhënësi publikoi një humbje neto prej 501.6 milionë euro në tremujorin e fundit të 2017-ës. Raporti i mjaftueshmërisë së kapitalit të bankës (CET1) qëndron në 14.8%.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.