Riadi pranon vdekjen e gazetarit – “Si pasojë e një përleshje në konsullatën e Stambollit”

Riadi zyrtar, tashmë e ka pranuar vdekjen e gazetarit Jamal Khashogg brenda ambienteve të konsullatës së Arabisë Saudite në Stamboll. Konfirmimi vjen nëpërmjet televizionit publik, ku thuhet se gazetari ka vdekur si pasojë e një përleshje brenda konsullatës.

Për këtë arsye, autoritetet saudite bëjnë me dije se janë arrestuar dy zyrtarë të lartë, njëri prej të cilëve është numri dy i shërbimit të inteligjencës, ndërsa tjetri është krahu i djathtë i princit të kurorës.

Ky justifikim i Arabisë Saudite duket se është vlerësuar si jo shumë i besueshëm nga ana e Shteteve të Bashkuara të Amerikës por edhe vendeve të tjera të përfshira në këtë ngjarje.

Donald Trump paralajmëroi se incidenti i rëndë mund të çojë edhe në vendosjen e sanksioneve ndaj Riadit.

Pas dy javësh mohime të vazhdueshme, autoritetet saudite kanë pranuar kështu vdekjen e gazetarit i cili jetonte në Shtetet e Bashkuara të Amerikës, por pa zbardhur më shumë detaje, si psh vendprehja e trupit të tij.

Arabia Saudite ka qenë vazhdimisht një ndër aleatet kryesore të Shteteve të Bashkuara të Amerikës, ndërkohë që Donald Trump e ka theksuar edhe më shumë këtë strategji.

Nga ana tjetër, çështja në fjalë, që është kthyer në kryefjalën e skenës ndërkombëtare gjatë dy javëve të fundit, rrezikon seriozisht t`i ftohë këto marrëdhënie.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.