Rihapet gara për minierën e Vlahnës në Kukës – Rezerva e dytë më e madhe e kromit në vend
Ministria e Infrastrukturës dhe Energjisë ka hapur sërish procedurat për dhënien në shfrytëzim të zonës minerare nr. 294/7. Kjo leje minerare përkon me Minierën e Vlahnës në Kukës, e cila përbën rezervën e dytë më të madhe të kromit në Shqipëri dhe është një nga më të mëdhatë në Europë.
Ftesa e hapur për oferta vjen pas anulimit të procedurave të shpallura në mesin e vitit të kaluar.
Sipas dokumenteve shoqëruese të MIE, “Vlahna” llogaritet të ketë rreth 1,390,000 ton/m3 krom në një sipërfaqe prej 1.804 kilometrash katrorë.
Kriteret minimale për këtë zonë konkurruese përfshijnë prodhimin minimal prej 20 mijë tonësh në vit, si dhe një vlerë investimi minimale prej 250 milionë lekësh.
Afati i fundit për dorëzimin e ofertave është data 23 Mars, ditë në të cilën MIE do të nisë shqyrtimin e tyre.
Miniera e Vlahnës nisi punën në vitin 1986 dhe deri në vitin 2006 llogariste një prodhim total xeherori kromi prej 45 mijë tonësh. Kjo minierë është një nga tetë minierat në Shqipëri që kanë mbi 1 milion ton rezerva kromi.
Vitet e fundit, prodhimi minerar i kromit dhe ferrokromit në vend ka qenë i fiksuar në rreth 653 mijë ton, ose 127 milionë dollarë. Dhënia e lejes së shfrytëzimit për këtë minierë pritet të rrisë më tej prodhimin dhe eksportet e këtij minerali.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.