Rihapet tenderi për aeroportin e Sarandës – Gara e mëparshme nuk pati asnjë ofertë, afati i ri për dokumentet, deri në 26 nëntor
5 ditë pas anulimit të tenderit, Ministria e Infrastrukturës dhe Energjisë ka rihapur garën e partneritetit publik-privat për ndërtimin e aeroportit të Sarandës, në përpjekjen e radhës për të gjetur një investitor të interesuar për ndërtimin e kësaj vepre aeroportuale. Sipas dokumenteve të tenderit, kompanitë e interesuar duhet të dorëzojnë ofertat e tyre brenda datës 26 nëntor.
Ndërkohë që, kriteret që duhet të plotësojnë kompanitë janë thuajse të pandryshuara në raport me garën e mëparshme, ndonëse në njërin prej tyre është përcaktuar se kompania duhet të ketë përvojë thelbësore në menaxhimin dhe përmirësimin e të paktën një aeroporti tregtar, duke lehtësuar disi këtë kërkesë nga gara e mëparshme që kërkonte disa përvoja në këtë drejtim.
Hapja e kësaj gare vjen pak ditë pasi Ministria e Infrastrukturës dhe Energjisë njoftoi anulimin e garës për shkak të mosparaqitjes së asnjë oferte brenda afateve kohore të dorëzimit të ofertave. Gara për dhënien me konçesion të aeroportit të Sarandës u hap në fillim të muajit gusht, ndërkohë që në përpjekje për të siguruar oferta të vlefshme, Ministria e Infrastrukturës dhe Energjisë ndryshoi 2 herë kriteret dhe afatin e dorëzimit të ofertave, duke e zgjatur deri në datën 14 tetor, nga 23 shtatori që ishte fillimisht.
Por, pavarësisht këtyre ndryshimeve duket se asnjë investitor nuk paraqiti interes për të nënshkruar një kontratë 35-vjeçare, me një vlerë të parashikuar investimit prej 34.32 mln euro.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.