Rikonstruksioni i kopshteve – Veliaj: Kopshtet publike kanë rritur cilësinë
Pas rikonstruksionit të çerdheve dhe të rindërtimit të shkollës “Kosova”, Bashkia e Tiranës rikonstruktoi edhe “Kopshtin 18” në njësinë numër 2, i cili ka ulur edhe ngarkesën në kopshtet e tjera përreth kësaj zone. Kreu i bashkisë Erion Veliaj, gjatë inspektimit, u shpreh se falë investimeve kopshtet tashmë ofrojnë kushte më të mira dhe cilësi
“Jam shumë entuziast sot që hapet “Kopshti 18”, një kopësht jashtëzakonisht i rëndësishëm për mua sepse dikur ka qenë edhe kopshti im. Jam shumë i lumtur që kopshti jo vetëm është rregulluar, por i janë shtuar hapësirat me disa dhjetëra metra katrorë. Do të thotë që kemi shtuar grupet, kemi kaluar nga një kopsht me 150 fëmijë në një kopsht që tani ka thuajse 300 fëmijë”, tha Veliaj.
Sipas kreut të bashkisë , shumë shpejt do të jetë gati edhe shkolla “Mihal Grameno”, e cila është në proces rikonstruktimi.
“E kemi filluar këtu mbrapa me një çerdhe të re, pastaj fëmijët rriten dhe vijnë në një kopsht të ri, e pasi mbarojnë ciklin në kopshtin e ri, mund të shkojnë te shkolla “Kosova” ose te shkolla “Mihal Grameno”, që sapo ka filluar rikonstruksioni dhe do jetë gati vitin tjetër. Eksperienca në Tiranë do të jetë një eksperiencë ideale për fëmijët, diçka që e mbajnë mend tërë jetën dhe që i ka formuar ata si njerëz të shkëlqyer”
Veliaj theksoi se në këto projekte nuk ka munguar dhe mbështetja e ndërkombëtarëve dhe në rastin konkret ishte Turqia e cila financoi për mobilimin e kopshtit. Aktualisht ky shtet ka realizuar rreth 500 projekte zhvillimi në vendin tonë.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.