Rikonstruksioni i kopshtit 55, Veliaj: Cilësia dhe shërbimi kanë rritur ndjeshëm interesin e qytetarëve

Një tjetër kopësht në Tiranë është rikonstruktuar plotësisht dhe është gati të presë fëmijët për vitin e ri shkollor. Kopshti 55 në Njësinë 4 është i 30-ti që rikonstruktohet nga Bashkia e Tiranës.

Cilësia dhe shërbimi i tyre kanë sjellë një interes dhe kërkesë shumë të lartë të prindërve për të çuar fëmijët e tyre në kopshtet publike.

“Njësia 4 është një tjetër njësi ku kemi përfunduar rikonstruksionin e të gjitha kopshteve dhe çerdheve dhe më në fund do kalojmë në njësi të tjera më periferike. Shumë shpejt do të hapim edhe çerdhe e kopësht të ri te Bregu i Lumit, duke iu përgjigjur me ofertë konkrete të gjitha kërkesave që kanë prindërit për kopshte dhe çerdhe të reja”, tha kryetari i Bashkisë.

Kryebashkiaku Veliaj gjatë inspektimit të punimeve, theksoi faktin se investimet shumë cilësore të realizuara në të gjitha çerdhet dhe kopshtet ku ka ndërhyrë Bashkia e Tiranës, ka bërë që të rritet ndjeshëm kërkesa e prindërve për të çuar fëmijët e tyre në to.

“Mjafton vetëm të shikoni përreth dhe kuptoni që një ndërtesë publike edhe duket më mirë, edhe është punuar me cilësi, i ka shtuar vlerën zonës në të gjithë këtë komunitet, është shumë herë më cilësore se shumë prej kopshteve private. Kjo është arsyeja pse kemi pasur një fluks të jashtëzakonshëm kërkesash për t’u regjistruar në institucionet publike, çerdhet, kopshtet. Mbaj mend përpara dy vitesh ishin bosh sepse nuk donte njeri, sot kemi nga 8-9 kërkesa për një vend”, shtoi Veliaj.

Kopshti 55 ka 4 grupe fëmijësh dhe tashmë do të funksionojë edhe si kopsht me drekë. Në të janë bërë ndërhyrjet e duhura duke krijuar infrastrukturë dhe ambiente moderne për fëmijët.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.