Rikonstruksioni i rrugëve – Veliaj: Po krijojmë kushte më të mira për banorët
Bashkia e Tiranës ka përfunduar në një kohë të shkurtër rikonstruksionin total të rrugës “Selaudin Bekteshi” në Njësinë Nr.4. Gjatë inspektimit të punimeve, kryebashkiaku, Erion Veliaj, tha se kjo është një tjetër dëshmi se punohet çdo ditë, pavarësisht faktit se jemi në verë dhe kjo është një ndër 100 rrugët ku është ndërhyrë për ta transformuar në një rrugë me të gjitha parametrat.
Kryebashkiaku tha se veç investimeve në infrastrukturën rrugore, ujësjellës, gjelbërim, kësaj zone do t’i shtohet shumë shpejt edhe një tjetër investim i rëndësishëm në infrastrukturën arsimore.
Ai u ndal edhe te situata e ujit të pijshëm, duke theksuar se falë aksionit të Task-Forcës por edhe të bashkëpunimit që kanë treguar qytetarët situata është drejt normalizimit.
Nga monitorimi i situatës në terren nga grupet e task forcës së ngritur nga Bashkia dhe UKT u verifikuan 1167 raste, ku u identifikuan dhe u shkëputën 216 raste të lidhjeve të paligjshme në rrjetin e ujësjellësit, duke qenë se uji i pijshëm përdorej për ujitje apo për larje të automjeteve. Gjatë këtyre tre ditëve u vendosën gjoba për 10 abonentë familjarë dhe për 3 biznese.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.