Rikonstruktohet blloku i banimit pranë Ambasadës Amerikane – Veliaj: Do të vijojë puna edhe në blloqe të tjera

Ka përfunduar rikonstruksioni i plotë i bllokut të banimit pranë Ambasadës Amerikane. Krahas transformimit të rrugëve, trotuareve si dhe vendeve të parkimit, kësaj lagjeje i janë shtuar edhe hapësirat e gjelbra, këndet rekreative dhe argëtuese për fëmijët dhe të rriturit.

Kryetari i Bashkisë së Tiranës, Erion Veliaj i shoqëruar edhe nga deputetja e PS-së, Vasilika Hysi inspektoi mbylljen e punimeve për rikualifikimin e këtij blloku, që sipas tij, ky i fundit do t’i shërbejë më shumë se 5 mijë banorëve.

Ndërkohë, shtoi më tej se do të vijojë puna edhe për transformimin e blloqeve të reja të kësaj lagje, që shtrihen përgjatë Rrugës së ‘Elbasanit’ dhe Rrugës ‘Pjetër Budi’ si dhe do të bëhet po ashtu rikonstruksioni i fasadave të pallateve.

“Do të vazhdojmë edhe në lagjen tjetër, që është investim akoma më i madh, nga Rr. “Budi”, shkolla “Labinoti” dhe gjithë blloku i kësaj mëhalle. Njësia 2 është e madhe në popullsi sa ndoshta qyteti i dytë dhe i tretë më i madh i Shqipërisë. Pra, nëse do të kishte një qytet të dytë mbas Tiranës do të ishte Njësia 2 dhe Njësia 5. Ndaj meriton që të dalë në dritë”, tha Veliaj.

Sipas Veliajt, ndryshimet në mentalitet, krahas atyre në infrastrukturë janë edhe investimi më i madh në këtë periudhë 3-vjeçare që prej marrjes së mandatit si kryetar i bashkisë së Tiranës.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.