Rikonstruktohet blloku i banimit tek Dogana – Veliaj: Transformuam 35 rrugë, s’ka më trafik të rënduar
35 segmente rrugore janë rehabilituar në bllokun e banimit në zonën e Doganës. Kryebashkiaku i Tiranës, Erion Veliaj ka inspektuar përfundimin e punimeve për rikualifikimin urban të kësaj zone, që përfshijnë ndërtimin e infrastrukturës nëntokësore, punime në trupin e rrugës për shtresat përkatëse dhe trotuare, ndërtimin e rrjetit të ndriçimit rrugor dhe linja rezervë, ndërtimin e sinjalistikës horizontale dhe vertikale.
Sipas Veliaj, me transformimin e rrugëve tashmë kjo zonë nuk përballet më me trafikun e rënduar. Më tej, gjatë inspektimit ai tha se pas legalizimit të ndërtimeve informale, bashkia po vijon punën për urbanizimin e këtyre zonave.
“Njësia 7 është njësi specifike, ka një pjesë shumë të madhe të asaj që ne e quajmë një kore urbane e pjesës së vjetër të Tiranës, ndërkohë është edhe pjesa e re, kryesisht me njerëz të ardhur nga veriu dhe jugu i Shqipërisë, të cilët gjithashtu meritojnë që pas 27 viteve të trajtohen njësoj si gjithë qytetarët e tjerë Tiranës. Do të thotë legalizim nga qeveria qendrore dhe urbanizim nga bashkia. Tani që kemi urbanizim, investojmë me risitë më të fundit; pra, me ndriçim Led dhe duke e bërë ujësjellësin nga e para”, tha Veliaj.
Ndërsa, shtoi më tej se Bashkia e Tiranës do të jetë në terren edhe në këtë vit të fundit të mandatit duke çuar investimet edhe në zonat rurale të Tiranës.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.