Rikonstruktohet Rruga e Dibrës – Veliaj: Me ndërtimin e Rrugës së Arbrit, do të bëhet hyrja kryesore në verilindje të Tiranës
Ka përfunduar rikonstruksioni i plotë i Rrugës së Dibrës, një nga arteriet kryesore të kryeqytetit. Përveç rikonstruksionit, është mundësuar gjithashtu edhe një korsi e dedikuar për biçikleta, si dhe fasadat e pallateve përgjatë saj janë rehabilituar.
Krybashkiaku, Erion Veliaj u shpreh se me ndërtimin e Rrugës së Arbrit, kjo rrugë do të bëhet hyrja kryesore në verilindje të Tiranës.
“Ashtu siç kemi bërë një hyrje dinjitoze në Rr. “Dritan Hoxha” apo siç po fillojmë tani me rrugën e Kombinatit, kjo është një tjetër hyrje e Tiranës e cila ka dalë në dritë dhe u jep mesazhin njerëzve se këtu ka një cilësi tjetër të të bërit të punëve, pastërti, higjienë dhe rregull”, tha Veliaj.
Realizimi i këtij projekti ka përfshirë zgjerimin e trotuareve, duke shtyrë kështu muret e Ministrisë së Mbrojtjes, për të bërë të mundur edhe ndërtimin e një tjetër segmenti me korsi të dedikuar për biçikletat.
Veliaj tha se me përfundimin e disa akseve kryesore rrugore është bërë e mundur edhe ndërhyrja në lagjet e kryeqytetit. Po ashtu, shtoi se Bashkia e Tiranës do të përmbyllë fazën e emergjencës në pjesën e mbetur të mandatit.
“Do t’i japim një sprint këtë vit të fundit të mandatit tonë, për t’u siguruar që ky katërvjeçar mbuloi emergjencat kryesore për Tiranën dhe pastaj në mandatin tjetër do të vijojmë me më shumë fuqi dhe energji për Tiranën e ëndrrave tona”, deklaroi ai.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.