Rikonstruktohet së shpejti ‘Unaza e Sipërme’ në Divjakë – Hapet tenderi, ndërhyrjet që përfshin projekti
Rruga ‘Unaza e Sipërme’ e fshatit Kryekuq në Divjakë do t’i nënshtrohet së shpejti rikonstruksionit. Për rindërtimin dhe zgjerimin e saj është akorduar një fond limit prej më shumë se 42 milionë lekësh.
Bashkia ka hapur edhe procedurat e prokurimit publik për këtë projekt, i cili parashikon një kohëzgjatje të zbatimit të punimeve 6 muaj kalendarikë nisur nga data e firmosjes së kontratës.
Projekti parashikon sistemimin dhe asfaltimin e plotë të rrugës, gjendja aktuale e së cilës është pa bazament. Rruga është projektuar të ndërtohet me dy korsi, si dhe do të plotësohet më tej edhe me elementët bazë si trotuar në njërën anë, kuneta betoni në dy anët e saj si dhe do të pajiset edhe me lulishte varësisht gjerësisë së rrugës.
Gjelbërimi është menduar të bëhet me pemë dekorative të përshtatshme për këtë zonë të mbrojtur si park natyror. Ky investim pritet të lehtësojë jo vetëm lëvizjen e banorëve, por njëkohësisht do të shërbejë edhe si një shtysë për turizmin dhe zhvillimin e mëtejshëm të bujqësisë.
Fshati kodrinor i Kryekuqit ndodhet në jug të qytetit të Divjakës dhe është pjesë e Njësisë Administrative Remas. Unaza e Sipërme e Kryekuqit ka një shtirje në veri të fshatit me orientim Lindje-Perëndim në të gjithë gjatësinë e saj.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.