Rikthehen tarifat e çelikut dhe aluminit/ Trump: ”Brazili dhe Argjentina kanë zhvlerësuar valutat. Tarifa, menjëherë!”
Presidenti i Shteteve të Bashkuara, Donald Trump, lajmëroi se do të rikthejë menjëherë tarifat e çelikut dhe aluminit të importuar nga Brazili dhe Argjentina.
“Brazili dhe Argjentina kanë përfituar nga zhvlerësimi i madh i valutave të tyre, ç’ka po dëmton fermerët tanë. Për rrjedhojë, unë do rikthej menjëherë tarifat ndaj të gjithë importeve të çelikut dhe aluminit që vijnë nga këto vende”, shkroi Trump në Twitter në nisje të javës.
Presidenti i Shteteve të Bashkuara kritikoi edhe Rezervën Federale, duke i bërë thirrje për uljen e interesave në mënyrë që vendet të mos përfitojnë më nga dollari i fortë.
Vitin e kaluar, Trump nënshkroi urdhrin për të vendosur tarifa prej 25% ndaj importeve të çelikut dhe 10% ndaj aluminit, që u bënë efektive më 23 Mars.
Shtëpia e Bardhë ofroi më vonë përjashtime për Bashkimin Europian, Argjentinën, Australinë, Brazilin, Kanadanë, Meksikën dhe Korenë e Jugut. Instituti brazilian i Çelikut lajmëroi këtë javë se vendimi i fundit i SHBA përbën një hakmarrje të pavend dhe se do të dëmtojë interesat e vetë kompanive amerikane.
Presidenti brazilian, Jair Bolsonaro tha se do të diskutojë me kabinetin dhe komunikojë në mënyrë direkte me presidentin amerikan, nëse do të jetë nevoja. Ministria e Jashtme në Argjentinë, deklaroi gjithashtu se do të nisë negociatat me SHBA.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.