Rikthehet ligji për qeset plastike – Pas përpjekjeve për t’i ndaluar në vitin 2019, dorëzohet i njëjti draft në Kuvend

Ministria e Turizmit dhe Mjedisit ka depozituar në Kuvend projektligjin që parashikon ndalimin e prodhimit, përdorimit dhe importimit të qeseve plastike. Sipas këtij dikasteri, përmes këtyre ndryshimeve, parashikohet me ligj ndalimi i prodhimit të: qeseve plastike mbajtëse, qeseve plastike mbajtëse shumë të lehta, qeseve plastike mbajtëse të lehta dhe qeseve plastike të oxodegradueshme dhe oxo-biodegradueshme.

Megjithatë, kjo nuk është hera e parë që ndërmerren këto ndryshime ligjore. Kjo pasi, edhe në vitin 2019 ndryshimet ligjore u propozuan, por ato asnjehër nuk u votuan në parlament e për pasojë nuk hynë në fuqi. Ndërkaq, sipas ministrisë edhe në tentativën e dytë,  për shqyrtim në Kuvend është depozituar versioni i vitit 2019.  Propozimet e asaj kohe parashikonin edhe masën e gjobave për individët dhe subjeket që kapen në shkelje. Sipas tyre, çdo person që hedh në treg, prodhon, importon, apo fut në territorin e Shqipërisë qese plastike mbajtëse, gjobitet nga 1 000 000 – 1 500 000 lekë. Ndërkohë që, çdo person që i përdor këto qese do të gjobitet me 30 mijë-100 mijë lekë.

Megjithatë, në atë kohë projektligji hasi në kundërshtime të forta nga prodhuesit shqiptarë, të cilët deklaruan se kjo masë do të sjellë një rënie të industrisë në vend, teksa do të ketë pasoja negative te punësimi, duke qenë se kjo industri punëson një numër të përgjithshëm prej 30 mijë vetësh. Referuar projektligjit të asaj kohe, ndalimi i importit apo prodhimit të qeseve mbajtëse do të bëhej nga data 1 shkurt 2020, ndërkohë që përdorimi apo futja në territorin shqiptar të tyre do të ndalohej nga data 1 qershor 2020.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.