Rikthehet trendi “polak”, Instat: Hyrjet nga Polonia rriten me 40%, më e larta e të gjitha shteteve për janarin

Ndërkohë që hyrjet e shtetasve polakë në Shqipëri janë shoqëruar me “shkëlqim” e më pas me “rënie” në vitet e fundit, mesa duket 2020 i ka rikthyer në vend. Sipas të dhënave më të fundit të publikuara nga Instituti i Statistikave, në janar 2020 ndër shtetet me hyrjet më të larta në Shqipëri, Polonia ka pasur rritjen më të madhe.

Instat tregon se kjo rritje është shënuar me afro 40%, krahasuar me të njëjtin muaj të vitit 2019. Megjithëse një muaj nuk është i mjaftueshëm për t’u “ekzaltuar”, mund të jetë sipari i një fillimi të ri. Kujtojmë se që në vitin 2014, Shqipëria pati 4 sezone të mbara turistike ku u shënua “boom” nga vizitat polake, ndërkohë që krejt e kundërta nisi të ndodhtë që në fund të 2018, e më tej përgjatë gjithë vitit 2019.

Referuar Instat, në muajin e parë të vitit 2020, Shqipëria pati 546 hyrje nga Polonia, në një kohë që në janar 2019, kjo shifër ishte 393. Mbetet për t’u parë nëse kjo “e mirë” i adresohet ndonjë agjencie turistike, nëse është rastësi jetëshkurtër, apo nëse polakëve ju kanë mbetur ende copëza nga eksplorimi i plotë i Shqipërisë, qoftë në vizita turistike, me qëllime biznesi, apo shëndetësore!

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.