Rikualifikimi i blloqeve të banimit, Veliaj: Çdo vit do të rehabilitojmë 50 të tilla
Përfundon rikualifikimi urban i bllokut të banimit pranë Pallatit me Shigjeta. Gjatë përurimit, Kryetari i Bashkisë së Tiranës Erion Veliaj, theksoi se ky investim është tregues se Tirana funksionon vetëm me punë, duke siguruar se puna e institucionit që ai drejton nuk do të ndalet edhe gjatë muajve të verës.
“Tirana funksionon vetëm me punë, shpresë e optimizëm dhe besoj se vetëm duke zgjidhur çdo ditë nga një problematikë, siç ishte kjo kënetë që kemi pasur tek Pallati me Shigjeta dhe kjo situatë aspak e këndshme ku fëmijët s’kishin një hapësirë, duke e rikthyer në një hapësirë falë duarartëve të Bashkisë dhe të papërtuar edhe në këto ditë vere, vetëm kështu mund të ecim përpara”, tha Veliaj.
Kreu i Bashkisë teksa siguroi qytetarët për rehabilitimin e 50 blloqeve të banimit çdo vit, u kërkoi atyre që të zgjedhin administratorin për secilin pallat dhe të bashkëpunojnë për t’i mirëmbajtur këto investime.
“Kemi një premtim: Çdo vit do të rehabilitojmë 50 blloqe banimi. Tirana ka qindra të tillë, të cilat kanë nevojë të sistemohen, por duke punuar çdo ditë nga një, kjo është mënyra se si ecim përpara. Duke bërë llogje, duke penguar e sharë njëri-tjetrin, duke u marrë me punë të kota, vetëm humbasim kohë. Tirana ka humbur 4 vjet boll me kunetërit, tani duhet të ecim përpara vetëm me punë. Vetëm puna na nxjerr në dritë”, tha ai.
Ndërhyrja në bllokun e banimit pranë Pallatit me Shigjeta konsistoi në sistemimin e të gjithë hapësirës, ku përveç vendosjes së moduleve të ndryshme të lojërave, u realizua vendosja e stolave, ndriçimit si dhe ndërhyrja në kanalizime që do të shmangë përmbytjet në rast të reshjeve.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.