Rimëkëmbet industria gjermane – Rritje për të dytin muaj me radhë, në vrull pas dy vitesh
Kërkesa e lartë nga jashtë vendit ka nxitur ndjeshëm porositë industriale në Gjermani gjatë Marsit, tregojnë të dhënat më të fundit. Kjo është rritja e dytë me radhë, çka tregon se, sektori po e tejkalon periudhën e luhatshmërisë dhe do të kontribuojë në rritjen ekonomike gjatë muajve në vijim.
Ashtu si në të gjithë Eurozonën, edhe ekonomia numër një e rajonit, ka vuajtur një sektor industrial në dobësi gjatë vitit të fundit.
Porositë për produktet “Made in Germany” u rritën me 1% gjatë Marsit, tregojnë të dhënat e ministrisë së ekonomisë në vend.
Kjo është e para herë që prej nëntorit të vitit 2015 që porositë industriale rriten për dy muaj me radhë. Kjo, e kombinuar me rritjen e ndjeshme të besimit të investitorëve, tregon se, sektori po fiton vrullin e munguar prej dy vitesh tashmë.
Gjatë muajit Shkurt ndërkohë, porositë u rritën me 3.5%, ndërkohë që, gjatë muajit të parë të vitit ranë me 6.8%.
Pavarësisht rezultatit, gjatë Marsit, kërkesa e brendshme ra ndjeshëm, me 3.8%, ndërkohë që kërkesa nga jashtë u rrit me 4.8%. Nga vendet e Eurozonës kërkesa është rritur me plot 6.8%.
Ekonomia gjermane projektohet të rritet me 1.5% gjatë këtij vitit, por të dhënat më të fundit sinjalizojnë një rritje edhe më të fortë se këto projeksione.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.