Rimëkëmbja e tregut të punës në SHBA. Numri i aplikimeve fillestare të asistencës për papunësinë bie në 837,000
Numri i aplikimeve fillestare të asistencës për papunësinë në Shtetet e Bashkuara ra në 837,000 javën e kaluar, ndërkohë që tregu i punës i goditur nga pandemia, po vazhdon të rimëkëmbet, sipas Departamentit të Punës. Në javën që përfundoi më 26 Shtator, numri i amerikanëve që aplikonin për përfitimet e papunësisë, ra me 36,000 nga java e mëparshme, ku qëndronte në 873,000, duke shënuar herën e 6 në 28 javët e fundit që numri bie poshtë 1 milionë.
Norma e lartë e papunësisë vjen prej tkurrjes së aktivitetit ekonomik. Të dhënat e fundit të publikuara këtë javë, treguan se ekonomia e shteteve të bashkuara u tkurr me një normë vjetore prej 31.4% në tremujorin e dytë, me një rrugëtim të pasigurtë drejt rimëkëmbjes nga Covid-19. Sipas projeksionit të fundit të Departamentit të Tregtisë, Produkti i Brendshëm Bruto real është 0.3% më i lartë se vlerësimi i mëparshëm prej 31.7%.
Rënia ekonomike në tremujorin e dytë ishte më e larta që kur qeveria nisi të mbajë të dhënat në vitin 1947. Numri i lartë i stafit të tepërt do të përkeqësojë gjithashtu situatën në tregun e punës. Deri në fund të Shtatorit, 4 linjat më të mëdha ajrore amerikane, kishin pushuar 150,000 punëtorë. Shumë kompani të sektorit kanë reduktuar pagat e ekzekutivëve si dhe shkurtuar e ndaluar fluturimet. Përveç linjave ajrore, shumë kompani të tjera të mëdha në Shtetet e Bashkuara kanë lajmëruar shkurtime në 48 orët e fundit. Walt Disney, lajmëroi se do të pushojë 28,000 punëtorë, apo 25% të fuqisë punëtore, tek parqet e lojërave në Shtetet e Bashkuara.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.