Rindërtimi i shkollave, rriten shifrat. Shkon në 95 milionë dollarë fondi buxhetor i parashikuar për objektet arsimore
Është publikuar këtë të premte në Fletoren Zyrtare Vendimi I Qeverisë I cili rrit në afërsisht 95 milionë dollar, nga 79 milionë i parashikuar fillimisht, fondin e parashikuar nga qeveria për rindërtimin e objekteve mësimore.
Në vendim, Këshilli i Ministrave ka miratuar përdorimin e fondit të rindërtimit, për financimin e rindërtimit të objekteve arsimore (projektimin, zbatimin e punimeve, mbikëqyrjen dhe kolaudimin e këtyre objekteve) në vlerën, gjithsej, në masën 9.5 miliardë lekë pa TVSH, përkatësisht: i. Fondit Shqiptar të Zhvillimit, në vlerën, gjithsej, 4.3 miliardë lekë; dhe ii. Bashkisë Tiranë, në vlerën, gjithsej 5.1 miliardë lekë.
Fondi që do të përdoret, i miratuar në buxhetin e vitit 2020, do të jetë 7.2 miliardë lekë pa TVSH. Prej tyre 4.3 miliardë lekë, afërisht 43 milionë dollar, do të përdoren nga Fondi Shqiptar I Zhvillimit, ndërsa pjesa tjetër nga Bashkia e Tiranës.
Në projektin fillestar të programit të rindërtimit të objekteve arsimore përfshiheshin 59 shkolla të reja, godinat e reja të të gjithë konvikteve të Universitetit Bujqësor, si dhe 4 godina të reja konviktesh në Qytetin Studenti.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.