Rindërtimi pas tërmetit. Këshilli Bashkiak i Tiranës miraton rindërtimin e 250 banesave të tjera
Këshilli Bashkiak i Tiranës miratoi të shtunën 250 kontrata të reja për familjet që mbetën pa strehë nga tërmeti i nëntorit. Gjatë fjalës së tij Kryetari i Bashkisë Erion Veliaj, u shpreh se Viti i Ri do t’i gjejë këto familje në shtëpitë e reja.
Kemi mbyllur zyrtarisht menaxhimin e krizës për tërmetin e 21 shtatorit. Kemi shlyer pagesat cash për 1800 familje që patën dëmtime nga tërmeti i shtatorit, ndërkohë janë rindërtuar 60 shtëpi, të cilat tërmeti i shtatorit i dëmtoi përtej riparimit. Mezi pres që të njëjtën gjë ta themi edhe për familjet e tërmetit të 26 nëntorit. Kemi filluar me dhënien e shtëpive të para, që janë ndërtuar përmes procesit të rindërtimit”, u shpreh Veliaj.
Këshilli Bashkiak miratoi edhe ngritjen e Agjencisë “Tirana Agrikulturë”, e cila do të ndërtojë tregun e parë agroushqimor publik në kryeqytet. Tregu, i cili do të jetë tërësisht me produkte “Made in Tirana”, është një tjetër premtim i mbajtur ndaj qytetarëve të Tiranës.
“Siç e keni parë, Bashkia i menaxhon shumë herë më mirë se privati edhe parkingjet, apo shumë prej aseteve që më përpara jepeshin lart e poshtë nëpër privatë. Me të njëjtën mënyrë, unë besoj se Bashkia e Tiranës e ka të gjithë fuqinë që, me një treg agroushqimor publik, të bëjë një konkurrencë me privatin edhe me çmime më ulëta, edhe në një vend më të aksesueshëm në Luginën e Erzenit, aty ku është edhe toka më pjellore, ku produktet “Made in Tirana” janë më të bollshme. Nuk ka nevojë të presim 2023-shin për të mbajtur premtime që kemi dhënë në fushatën e vjetshme. Të fillojmë t’i mbajmë që sot,” deklaroi kryebashkiaku Veliaj.
Agjencia “Tirana Agrikulturë” do të funksionojë si drejtori e Bashkisë së Tiranës dhe do të vendoset pranë njësisë administrative Baldushk.
Arbër Hitaj / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.