Ringrihet infrastruktura arsimore në Laç, Rama: Investim në arsim e shëndetësi në të gjithë vendin
Ka përfunduar rikonstruksioni në institucionet kryesore arsimore të Kurbinit, duke ofruar të gjitha kushtet e nevojshme për fëmijët e nxënësit. Në ditën ndërkombëtare të fëmijëve Kryeministri zgjodhi të jetë mes fëmijëve të këtyre shkollave, ku deklaroi se investimet në infrastrukturën arsimore dhe shëndetësore do të shtrihen në të gjithë vendin.
“Në buxhetin e vitit tjetër kemi një tjetër paketë të rëndësishme, me 300 qendra shëndetësore në të gjithë Shqipërinë me standarde europiane dhe me po kaq shkolla të rindërtuara kompletojmë më në fund të gjithë nevojën e trashëguar prej çerekshekulli që faktikisht na mbeti në dorë me gjithë këto gërmadha të tmerrshme nga të katër anët e Shqipërisë për shkak të mungesës së prioritizimit dhe të vëmendjes të fokusuar hap pas hapi,” deklaroi Kryeministri Edi Rama.
Ministrja e Arsimit, Lindita Nikolla tha se këto investime ishën të nevojshme.
“Është një investim prej 100 milionë lekësh të reja. Besoj përfundimi i investimit do ta kthejë realisht edhe në një Shkollë Qendër Komunitare, sepse janë të gjitha parametrat në projekt që të mundësohet më shumë aktivitet edhe për komunitetin. Është mbyllur korpusi, kopshti, kjo 9-vjeçare që ishte më në nevojë për investim edhe gjimnazi, që, që nga viti 60 edhe ai nuk kishte pësuar asnjëherë një investim në infrastrukturë,” nënvizoi ministrja e Arsimit, Lindita Nikolla.
Kopshti më i madh i qytetit, është rikonstruktuar plotësisht, duke ofruar mjedise të ngrohta, kreative dhe mjaft argëtuese për 232 vogëlushët që e frekuentojnë atë.
Po ashtu edhe rikonstruksioni i plotë i shkollës së mesme të përgjithshme “At Shtjefën Gjeçovi” ofron tashmë të gjitha kushtet cilësore për afro 1000 nxënës dhe mësues që ulen çdo ditë në bankat e kësaj shkolle.
Shkolla 9-vjeçare “Gjin Pjetri” tashmë i është nënshkruar rikonstruksionit të plotë, ku mbi 500 nxënës që ulen në bankat e kësaj shkolle do të kenë jo vetëm klasa të reja dhe të standardeve europiane, por edhe të gjitha ambientet e tjera laboratorike, si dhe ato sportive të reja.
Kryeministri Rama u ndal edhe në qendrën e qytetit ku inspektoi sheshin e rindërtuar dhe hapësirat e rikualifikuara përreth në saj të Rilindjes Urbane.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.