Rinovim flotës së urbanëve – Veliaj në Verona, projekte në transportin publik  dhe ndriçim

Bashkia e Tiranës dhe ajo e Veronës së shpejti do të vënë në jetë dy projekte të përbashkëta në fushën e transportit publik dhe ndriçimit.

Kryebashkiaku i Tiranës, Erion Veliaj, zhvilloi një vizitë të shkurtër në Itali, me ftesë të kryebashkiakut të Veronës, Federico Sboarina, me të cilin diskutoi për bashkëpunime konkrete, një prej të cilave konsiston në rinovimin e flotës së autobusëve publik, duke i zëvendësuar ato me mjete elektrike.

“Po studiojmë mënyrën se si edhe me ndriçimin e qytetit, edhe me transportin publik, të ecim përpara. Ashtu siç kam premtuar, nëse privatët nuk do modernizojnë flotën e mjeteve, duke i kthyer ato në elektrike, bashkëpunimi me Veronën është prova konkrete që kemi nisur për të zëvendësuar shumë prej linjave private. Ashtu siç bëjmë më mirë pastrimin e qytetit, ashtu do të bëjmë edhe transportin publik”.

Kryebashkiaku Veliaj zhvilloi edhe një takim me Presidentin e Rajonit të Venetos, Luca Zaia, një prej zonave më të zhvilluara të Italisë, ku nënvizoi rëndësinë e rritjes së investimeve në fushën e bujqësisë dhe turizmit.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.