Rishikohet ekonomia e Britanisë – Rritet me 0.2% në T1 prej vrullit në sektorin e shërbimeve

Produkti i Brendshëm Bruto në Britani për tremujorin e parë është rishikuar në rritje, prej vrullit në sektorin e shërbimeve gjatë muajit Prill, duke rritur shpresat për një rimëkëmbje në tremujorin e dytë. Prodhimi në sektorin e shërbimeve u rrit me 0.3% në Prill, që është norma më e lartë mujore që prej Nëntorit 2017.  Ekonomia e Britanisë u rishikua në rritje me 0.2% me bazë tremujore për fillimin e 2018-ës, nga 0.1% që vlerësohej më parë.  Me bazë vjetore, Produkti i Brendshëm Bruto u rrit me 1.2%, normë e pandryshuar dhe performanca më e dobët që prej tremujorit të dytë 2012.

Gjatë fillimit të vitit, ekonomia e Britanisë mori goditje nga moti i pazakontë, përveç tkurrjes së konsumit të shkaktuar nga inflacioni dhe ngurrimi i bizneseve për të investuar prej pasigurisë nga Brexit.  Në fund të vitit të kaluar, Britania ishte një nga ekonomitë me rritjen më të ngadaltë në grupin e 7 vendeve më të pasura.  Banka e Anglisë parashikon një rritje të PBB me 0.4% në tremujorin e dytë. Nëse ekonomia vazhdon me këtë ritëm, Banka e Anglisë pritet të rrisë normën bazë të interesit për të dytën herë që prej krizës financiare në takimin e 2 Gushtit.

Të dhënat zyrtare për prodhimin industrial dhe ndërtimin kanë qenë të dobëta, por shitjet me pakicë janë rritur dhe sondazhet drejt sektorit privat tregojnë për një rimëkëmbje në tremujorin e dytë.  Të dhënat e zyrës së Statistikave në Londër treguan gjithashtu se deficiti i llogarisë korrente u tkurr në 17.7 miliardë paund, apo në 3.4% të PBB.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.